«Qazaqfılm» kınostýdıasynyń aýmaǵynda aty ańyzǵa aınalǵan kınorejısser, KSRO Halyq ártisi Sháken Aımanovtyń týǵanyna 108 jyl tolýyna oraı eskertkishine gúl shoqtary qoıyldy, dep habarlaıdy Almaty-akshamy.kz
Sondaı-aq jaqynda ǵana 99 jasqa tolǵan QR halyq ártisi, Qazaqstan Respýblıkasy Memlekettik syılyǵynyń laýreaty, Qazaqstannyń Eńbek Eri Iýrıı Pomeransevke arnalǵan eskertkish juldyzdyń saltanatty ashylýy ótti.
Atalǵan sharaǵa densaýlyǵyna baılanysty Iýrıı Pomeransevtiń ózi qatysa almady. Saltanatty sharaǵa «Qazaqfılm» kınostýdıasy men M.Lermontov atyndaǵy memlekettik akademıalyq orys drama teatry basshylyǵy men ujymy, Ulttyq kınony qoldaý memlekettik ortalyǵynyń ókilderi, Sháken Aımanovtyń týǵan-týystary, belgili kınogerler men jýrnalıser qatysty.
«Mine, 40 jylǵa jýyq bizdiń kınostýdıamyz uly rejıser Sháken Aımanovtyń esimimen atalyp keledi. Ol bizdiń mádenıetimizdiń damýyna úlken úles qosty. Sháken Kenjetaıuly zamandastarymen birge ulttyq kınonyń berik irgetasyn qalady. Sondaı-aq, búgin qazaq kınosynyń Juldyzdar aleıasynda «Bizdiń súıikti dáriger» fılminde basty róldi somdaǵan QR halyq ártisi, Qazaqstannyń Eńbek Eri Iýrıı Borısovıch Pomeransevke arnalǵan ataýly juldyz jandy», - dedi «Qazaqfılm» kınostýdıasynyń prezıdenti Aqan Sataev.
Atalǵan sharaǵa M.Lermontov atyndaǵy Ulttyq orys drama teatrynyń dırektory Iýrıı Iakýshev qatysyp, kınostýdıa basshylyǵyna iltıpat bildirgeni úshin alǵys aıtyp, kelesi jyly Iýrıı Pomeransevtiń júz jyldyq mereıtoıy toılanatynyn atap ótti. İs-sharadan keıin Qazaq kınosynyń mýzeıinde qonaqtarǵa arnalǵan shaǵyn ekskýrsıa ótkizildi.
Ekskýrsıa barysynda «Qazaqfılmniń» prezıdenti Aqan Sataev jınalǵandarǵa jańǵyrtý baǵdarlamasy boıynsha kınostýdıaǵa satyp alynǵan jańa kınotehnıkany tanystyrdy.