Qurmanǵazy atyndaǵy Qazaq ulttyq konservatorıasynyń 80 jyldyq mereıtoıyna arnalǵan marafon saltanatty túrde bastaý aldy.
Merekeniń alǵashqy is-sharasy Úrmeli mýzyka keshi boldy, dep habarlaıdy aqshamnews.kz Mádenıet jáne aqparat mınıstrligine silteme jasap.
Bul mýzykalyq keshte stýdenttik ujymdar óner kórsetip, klasıkalyq mýzykadan bastap qazirgi zamanǵa deıingi ásem áýendermen kórermen yqylasyna bólendi.
Sahnada úrmeli aspaptarda oryndalatyn túrli áýender usynyldy. Onyń ishinde kerneıshiler ansambli, fleıtashylar, klarnetshiler, úrmeli kvıntet jáne úrmeli orkestr bar. Árbir nómirdiń shabyt pen sheberlikke toly óz oqıǵasy boldy.
Bul kesh úrmeli jáne urmaly aspaptar kafedrasynyń uzaq jylǵy eńbegi men tarıhyna jasalǵan qurmet ispettes. Kafedra murasy ónerge adal qyzmet etýge baýlyǵan túrli býyn mýzykanttarymen ólshenedi.
Keshtiń arnaıy qonaǵy Kúlásh Baıseıitova atyndaǵy Qazaq Ulttyq óner ýnıversıtetiniń «Daryn» memlekettik syılyǵynyń laýreaty Qalqaman Dúısenbaev jetekshilik etetin aǵash úrmeli aspaptar kvınteti boldy.
Qalqaman Dúısenbaev ta konservatorıany mereıtoıymen quttyqtap, shyǵarmashylyq tabys tiledi.
Mereıtoılyq marafon 23 qarashadan 3 jeltoqsanǵa deıin jalǵasady jáne Respýblıka saraıynyń sahnasynda ótetin saltanatty gala-konsertpen aıaqtalady. Kórermen osy kúnderi tanymal ujymdar men belgili solıserdiń, sondaı-aq konservatorıanyń daryndy túlekteriniń ónerin tamashalaı alady.