Telehıkaıada Rıza qaısar qyz Lı Shýıhýanyń beınesin somdady
Qytaılyq belgili óner juldyzy Rıza Álimjanqyzy Flying Apsaras syılyǵyn aldy. Bul týraly Qytaıdyń The Paper aqparat agenttigi jazdy, dep habarlaıdy Almaty-akshamy.kz.
Bıyl 33-shi ret úlestirilip otyrǵan Flying Apsaras syılyǵy Qytaıdyń teleóner salasyndaǵy eń joǵary memlekettik marapaty. Rıza Álimjanqyzy «Minning Town» telehıkaıasyndaǵy róli úshin «Úzdik aktrısa» nomınasıasynyń ıegeri atandy.
QazAqparattyń málimetinshe, «Minning Town» telehıkaıasy ótken jyly qańtar aıynda Qytaıdaǵy kórermeni eń kóp bes telearnada qatar kórsetilip, jurt óte joǵary baǵalaǵan. Oǵan Qytaıdyń Nınsá dúngen avtonomıalyq regıonynyń Sıhaıgý aımaǵyndaǵy aýyl turǵyndarynyń kedeılikpen kúresi arqaý bolady. Telehıkaıada Rıza qazymyr ákeniń qatal úkimine moıyn usynbaı, taǵdyryn óz qolyna alǵan qaısar qyz Lı Shýıhýanyń beınesin somdap, akterlik sheberligimen kórermenderdi tánti etedi.
1 qarasha keshte Beıjińdegi Shoýgan arenasynda ótken syılyq ıegerlerin marapattaý rásiminde Rıza Álimjanqyzy tolqyp turyp: «Men baqytty hám talaıly jan ekenmin. Qazylar alqasyna, eńbegimdi baǵalaǵan kórermenderge myń alǵys. Ózderińizge ana tilimde alǵysymdy bildirýge ruqsat etińizder, raqmet!» dep aǵynan jaryldy.
Ashyq derekkóz boıynsha, Rıza Álimjanqyzy 1986 jyly shildede Beıjińde týǵan. Óner jolyn orta mektepte áýesqoı model bolýdan bastaǵan, 2002 jyly Beıjiń kınematografıa ınstıtýtyn bitirip, akterlikke bet buradyú. 2011 jyly «Chjen Hýan-nyń keshýleri» telehıkaıasy arqyly tanyldy.