Qazaq qyzy tuńǵysh ret Everesti baǵydyrmaqshy, dep habarlaıdy almaty-akshamy.kz 24 KZ-ke silteme jasap.
Batyr arýdyń esimi – Anar Býrasheva. Jer sharynyń eń bıik shyńyna sapar 6 sáýirde bastalady. Almatyda jasaqtalǵan arnaıy ekspedısıany tájirıbeli álpınıs Maqsut Jumaev basqarady. Elimizdiń kók týyn bıikke kótermek ekspedısıanyń maqsaty – jastardy patrıottyqqa, sportqa tárbıeleý.
32 jastaǵy Anar Býrasheva skaıranner sportyna deıin bank menedjeri bolǵan. Qarjy salasyn artqa tastap, taýlarda júgirip júrgenine 10 jylǵa jýyqtapty. Almaty marafonynyń turaqty qatysýshysy Talǵar Hantáńiri shyńy, Monblan jáne Kılımandjaro syndy bıiktikterdi eńsergen. Endigi maqsaty – aspanmen talasqan Everesti baǵyndyrý. Ol teńiz deńgeıinen 8848 metr bıiktikte ornalasqan.
Anar Býrasheva, skaıranner-sportshy:
- Birinshiden, bul meniń armanym bolǵan, álemniń eń bıik shyńyna shyǵý. Birinshi qazaq qyzy bolý, meniń oıymsha, Otanymyz úshin óte mańyzdy. Sondyqtan qazaq qyzdary óte myqty degendi kórsetkim keledi.
Anardyń alǵa qoıǵan maqsaty oryndalsa, álemniń eń bıik shyńy – Everestke shyqqan alǵashqy qazaq qyzy atanady. Osyǵan deıin bul mejeni álemde 799 áıel baǵyndyrypty. Mundaı ataqqa ıe bolý ońaı emes, – deıdi 8848 metrlik shyńǵa qazaqtyń týyn eki ret tikken Maqsut Jumaev. Jartyjyldyq fızıkalyq daıyndyqtan bólek, sportshynyń júıkesi berik bolý kerek.
Maqsut Jumaev, ekspedısıa jetekshisi:
- Bizdiń komandanyń jetistigi mándi bolǵanyn qalaımyn. Mysaly, osy jolǵy eńbegimizdi soǵys ardagerleri, batyrlarymyz Saǵadat Nurmaǵambetov, Raqymjan Qoshqarbaev jáne Álıa Moldaǵulovanyń 100 jyldyǵyna arnaımyz. Everesti baǵyndyrý – úlken múmkindik. Sebebi Anar osy erligi arqyly qazaq qyzdaryna úlgi bolady.
7 adamnan turatyn top 6 sáýir kúni Almaty-Doha baǵyty arqyly Nepalǵa ushady. Áýeli 5300 metrde ornalasqan Everest bazalyq lagerine ornalasyp, taý jaǵdaıyna beıimdeledi. Ózderiniń kómekshileri sherpalarmen tanysady. Ekspedısıa músheleri ár shaqyrym saıyn arnaıy lagerde tynyǵyp, kúsh jınaıdy. Maqsut Jumaevtyń aıtýynsha, Everestiń sońǵy 848 metri asa qaýipti eken. Olar shyń basyna 16 saǵatta shyǵyp, 8 saǵatta túsýdi josparlap otyr.