Soltústik Qazaqstan oblysynyń ortalyǵy Petropavl qalasynda qazaq ádebıetiniń jaryq juldyzy, óshpes mura qaldyrǵan uly aqyny Maǵjan Jumabaıdyń 130 jyldyq mereıtoıyna oraı halyqaralyq ǵylymı konferensıa ótti, dep habarlaıdy Almaty-akshamy.k
Konferensıa bastalmas buryn, qonaqtar Maǵjan alańynda aqynnyń eskertkishine gúl shoqtaryn qoıdy.
Soltústik Qazaqstan oblysynyń ákimi Aıdarbek Saparov konferensıaǵa qatysýshylardy quttyqtap, shyǵarmashylyqtaryna tabys tiledi.
Konfenerensıaǵa kórshiles Ózbekstan, Qyrǵyzstan, Ázirbaıjan jáne Túrkıa Respýblıkalarynan kelgen qonaqtarmen qatar, elimizdiń belgili ǵalymdary, zıaly qaýym ókilderi de qatysty.
Qazaqstan Jazýshylar odaǵy basqarma Tóraǵasy Mereke Qulkenov konferensıanyń mańyzyn aıta otyryp, Maǵjannyń muralaryna asa jaýapkershilikpen qarap, shyǵarmalarynyń tolyq akademıalyq jınaǵyn shyǵarýymyz kerektigin atap aıtty.
«Maǵjan - qazaq poezıasyna lırıkanyń sony úlgisin ákelgen, qazaq jyryna eýropalyq jańa órnek salǵan, artyna óshpes rýhanı mura qaldyrǵan uly aqyn», - dedi M. Qulkenov.
Sondaı-aq, Qazaqstan Jazýshylar odaǵy atynan uly aqynnyń mereıtoıyna oraı joǵary deńgeıde konferensıa uıymdastyrǵan oblys ákimi A. Saparovqa Alǵys hat tabys etti.
Konferensıaǵa qatysqan baıandamashylar Maǵjan Jumabaıdyń shyǵarmashylyǵy, saıası qoǵamdyq ómiri, qyzmeti jaıynda qundy derekterimen ádebı málimetterdi tolyqtyrdy.