Qańtar-naýryz aılarynda Qazaqstan men Ózbekstannyń ózara taýar aınalymy 1,09 mlrd dollarǵa jetti.
Bul, ótken jyldyń sáıkes kezeńimen salystyrǵanda, 11 paıyzǵa kóp. Budan bólek, eki el birlesken ınvestısıalyq jobalardy júzege asyra bastady. Shekaralyq saýda ortalyǵyn qurý jónindegi jospar is júzinde oryndalyp jatyr. Osyǵan jaýapty úkimetaralyq komısıanyń taıaýda 20-otyrysy ótpek, dep habarlaıdy Almaty-akshamy.kz 24.kz-ke silteme jasap.
- Bul - Tashkenttiń jańa ortalyǵy. Ózbekstannyń ekonomıkalyq áleýeti men qýatyn kórsetip, alystan menmundalap turǵandaı. Qalanyń shyraıyn arttyrǵan bıik ǵımarattar osynda shoǵyrlanǵan. «Tashkent sıtı» atalyp ketken oryn Qyzylordanyń sementimen salyndy. Kórshimizdiń ónimdi bizden satyp alýyna joǵary sapa ári tıimdi baǵa sebep bolǵan, - deıdi telearna tilshisi Raýan Myńbaev.
Qazaq pen ózbek ózara saýdany damytyp, kólik-logıstıka salasyndaǵy yntymaqtastyǵyn jolǵa qoıdy. Ala shapandy aǵaıyn Qazaqstan arqyly Qytaı men Reseıge eksporttyq ónimin jóneltedi. Aqtaý portynyń múmkindigi artsa, transkaspıı dálizin qoldanýǵa da daıyn. Elimiz bir ǵana tasymaldan mol tabys tabady. Degenmen daıyn buıym jasaý mindeti de bar. Tashkent ónerkásip kórmesine qatysqan qyzylordalyq eki kásiporyn osy saladaǵy áleýetimiz mol ekenin kórsetti. Óńir sement jáne shyny shyǵarý isin tanystyrdy.
- Biz ishki naryqqa da, syrtqa da jumys isteımiz. SNG tóńireginde Reseı alady. Ózbekstan, Tájikstan jáne basqa da Ortalyq Azıadaǵy memleketter bizben seriktes. Jalpy, shyny jaıly tutynýshylar jaqsy pikirde, - deıdi shyny shyǵaratyn zaýyttyń ókili Nurjan Muhıt.
Al eki el birlesip quratyn ónerkásiptik kooperasıa - tutas Ortalyq Azıanyń áleýetin nyǵaıtýǵa sep. Túrkistan men Ózbekstannyń Syrdarıa oblysyn baılanystyratyn halyqaralyq shekaralyq saýda ortalyǵynyń quqyqtyq negizi shilde aıyna deıin daıyn bolady. Qazir ınvestısıalyq 38 joba ret-retimen júzege asyp jatyr. Ekeýi byltyr iske qosyldy. Bıyl birlesken bolat óndirisi, avtokólik qurastyrý jáne jeńil ónerkásip jobasy qolǵa alyndy.
- Saýda-ekonomıkalyq áleýetti arttyrýdyń mańyzdy baǵyttarynyń biri - óńirlik yntymaqtastyq. Osyǵan baılanysty birqatar is-sharalar ótkizý týraly sheshim qabyldandy. Máselen, óńirlik yntymaqtastyq forýmyn uıymdastyrýdy kózdep otyrmyz. Oǵan ákimder men bıznes qurylym jetekshileri qatysyp, áriptestikti odan ári nyǵaıtýǵa úles qosa alady,-deıdi Ózbekstan Respýblıkasynyń Investısıalar, ındýstrıa jáne saýda mınıstri Lazız Kýdratov.
Qazaqstan Úkimeti Túrkistanda klasterlik maqta sharýashylyǵyn qurýǵa da múddeli. Óńirde aq altyn egetin jer jetkilikti. Jobaǵa ınvestor kerek. Ózbekstannan da nıetti top qarastyrylyp jatyr. Tájirıbesimen bólisip, óndiristi jolǵa qoıyp berýge tıis. Qarjynyń basym bóligin memleket bóledi. Nátıjesinde elde teri óńdep, bylǵary jáne kıim shyǵaratyn aımaq paıda bolady.