Otandyq kınoındýstrıa álemi tórt serıaly “Qorqyt” bıografıalyq dramasymen tolyqty.
Telehıkaıanyń túsirilimi Almaty oblysy men Ózbekstan Respýblıkasyndaǵy Hıýa, Ferǵana, Buqara qalalarynda ótti. Týyndy Qazaqstan ulttyq telearnasynyń tapsyrysy boıynsha túsirildi, dep habarlaıdy almaty-akshamy.kz.
Jobanyń tarıhı keńesshisi ári senarı avtory – etnograf Berik Júsip. Rejıseri – Qanaǵat Mustafın. Qorqyttyń ár kezeńdegi rólderin Dinıslam Nurmaǵambet, Ádil Ahmetov jáne Aıdos Bektemir somdaıdy. Sonymen qatar negizgi tarıhı rólderdi Erkebulan Daıyrov, Zarına Karmen, Medǵat Ómiráli oınaıdy. Serıalda qyrǵyzdyń ataqty manasshysy Rysbaı Isaqov pen tanymal akter Askat Sýlaımanov ta boı kórsetedi.
Telehıkaıa sújetinde Qorqyttyń dúnıege kelýi, balalyq shaǵy, jetkinshek kezinen bastap, onyń sáýegeı, abyz retinde qalyptasý joly kórsetiledi. Telehıkaıa senarıi álemdik deńgeıde zerttelgen «Qorqyt ata» kitabyna, atap aıtqanda “Salor Qazannyń úıiniń shabylǵany týraly jyr” negizinde túsirilgen. Joba prodúseri Sholpan Batyrbaevanyń aıtýynsha, jańa telehıkaıanyń senarıi erekshe bolady.
– Týyndy eń áýeli jas aýdıtorıaǵa arnalyp túsirildi. Qazirgi jastardyń suranysy basqa. Sondyqtan tarıhı fılm, serıal túsirgende jastardyń tilin túsine bilý mańyzdy. Qart Qorqyttyń obrazy jastarǵa qyzyq bolmas edi. Sol úshin túsirilim toby kóp keńesip, hronologıalyq rettilikke, bıografıaǵa negizdelgen sújet qurastyrdy, – deıdi prodúser. Sholpan Batyrbaeva bul týyndyny halyqaralyq kınoserıal dep ataýǵa tolyq negiz bar deıdi.
– Serıal kastıngine úlken jaýapkershilikpen qaradyq. Akterlar quramynda elimizdegi eń úzdik mamandary jınalǵan. Sonymen qatar tanymal qyrǵyz akteri Askat Sýlaımanov pen áıgili manasshysy Rysbaı Isaqovtyń da rólderi bar. Buǵan qosa qańtar aıyndaǵy túsirilimder Ózbekstan jerinde ótti. Ol kezde túsirilim tobyna ózbektiń kıno salasyndaǵy úzdikteri de qosyldy. Sondyqtan túrki elderi ortaq ańyz jaıly alǵashqy serıalymyz halyqaralyq týyndy deýge bolady, – deıdi joba prodúseri Sholpan Batyrbaeva.
«Qorqyt» tarıhı bıografıalyq dramasy «Qazaqstan» teleradıokorporasıasynyń ózge memleketpen birlese túsirgen alǵashqy telehıkaıasy. Týyndy 16, 17 jeltoqsan kúnderi saǵat 14:40-ta Qazaqstan ulttyq arnasynyń efırinen kórsetiledi.
