Qazirgi tańda halyqaralyq sán sahnasynda elimizdiń atyn shyǵaryp júrgen jastar az emes. Solardyń biri – Jeńisbek Lashın. Qyzylordada týyp-ósken ol sán ındýstrıasyna aıaq astynan kelgenimen, búginde álemge tanymal brendtermen jumys istep, áıgili sán jýrnaldarynyń betterinen Zhengisbek degen esimmen kórinip júr. Modeldik joldyń ońaı bolmaǵanyn aıta otyryp, Jeńisbek bizben óziniń kásibı joly, shabyt kózi jáne sánge degen kózqarasy týraly bólisti.
– Jeńisbek myrza, ózińiz jaıly tanystyryp ótseńiz.
Meniń esimim – Jeńisbek Lashın. 1999 jyly 8 mamyrda Qyzylorda qalasynda dúnıege keldim. Qazirgi tańda halyqaralyq deńgeıde jumys isteıtin kásibı modelmin. Bul salaǵa erte kelgen joqpyn, biraq bir kúni jaqyndarym “modeldik agenttikke baryp kórseńshi” degennen keıin, qyzyǵýshylyqpen bardym. Sol bir sheshim búkil ómirimdi ózgertti.
– Sán salasyna qalaı keldińiz?
Bul salaǵa jolym kezdeısoq ashyldy. Model bolamyn dep sheshken kúnim – burynǵy baǵyttarymnan múlde ózgeshe tańdaý boldy. Qazir sol sheshimime esh ókinbeımin, kerisinshe álemniń birneshe elinde podıýmda júrmin.
– Jalpy mamandyǵyńyz kim?
Men Abylaı han atyndaǵy Qazaq halyqaralyq qatynastar jáne álem tilderi ýnıversıtetinde «Týrızm» mamandyǵy boıynsha bilim aldym. Qazir ózimdi tek model retinde emes, kreatıvti tulǵa retinde de qalyptastyryp kelemin. Vızýaldy komýnıkasıa, sán túsirilimderin qoıý, konsepsıalarmen jumys jasaý – bári meni qyzyqtyrady.
– Shetelde qandaı sán kórsetilimderine qatystyńyz?
Sońǵy kelisimsharttarymnyń biri – Ońtústik Afrıkadaǵy Keıptaýn qalasynda boldy. Onda John Frieda brendimen jumys istedim. Buǵan deıin Louis Vuitton, Michael Cinco, Arturo Obegero, Maison Du Mec, Lazoschmidl, Jordan Luca syndy brendterdiń kórsetilimderine qatystym.
– Sán degen siz úshin ne?
Sán – bul men úshin erkindik. Bul – óz-ózińdi tanytýdyń tásili. Kıim – jaı ǵana mata emes, ol ıdeıany, kóńil-kúıdi, bolmysty jetkizetin qural. Ár podıýmǵa shyqqanda men stılmen qatar maǵyna men emosıany jetkizgim keledi.
– Ómir saltyńyzǵa syn aıtatyndar bola ma?
Iá, keıde ómir súrý saltyma, stılime qatysty syn estıtin kezder bolady. Biraq men úshin eń bastysy – óz baǵytymnan taımaý. Ýaqyt óte kele sol syn aıtqandardyń ózi qoldaý bildirip jatady.
– Kúndelikti ómirde de sánge mán beresiz be?
Árıne. Podıýmdaǵydaı tym ashyq bolmasa da, kúndelikti kıim úlgisimde ózimniń ereksheligimdi, estetıkamdy saqtaýǵa tyrysamyn. Stıl – bul men úshin vızýaldy til.
– Qandaı sán jýrnaldarynda kórindińiz?
Mob Journal, Marie Claire Turkey, GQ Middle East, Vogue Arabia sıaqty halyqaralyq basylymdarda meniń fotosessıalarym jarıalandy. Bul – men úshin úlken mártebe.
– Qazaqstanda qandaı jobalarǵa qatystyz?
KFC, Samsung, Kazakhstan Fashion Week, Visa Fashion Week sıaqty brendtermen jumys istedim. Sondaı-aq, birneshe akterlik jobalarǵa da qatysqanym bar.
– Qazaqstan sán ındýstrıasynyń múmkindikteri qandaı?
Qazaqstanda áleýet bar, alaıda halyqaralyq standartpen salystyrǵanda, júıeli damý áli jol basynda. Talantty jastar kóp, tek olardy qoldaıtyn orta, kásibı alańdar kóbeıse, úlken nátıjege qol jetkizýge bolady.
Jeńisbek Lashın – sán álemindegi tabysqa eńbekpen jetken jas qazaqstandyq. Onyń joly – biregeılik pen batyl sheshimniń jemisi. Ol sándi kıim emes, oı men bolmys retinde kóredi. Model retinde ǵana emes, kreatıvti tulǵa retinde de damyp kele jatqan Jeńisbektiń oqıǵasy – jastarǵa shabyt, al sán ındýstrıasy úshin – jańa dáýirdiń belgisi.