Qazaq balasy bıtbokstan jeńimpaz atandy.
Oraldyq Eldar Ǵabdýllın bıtboksten AQSH-ta ótken álem chempıonatynda úzdik atandy, dep habarlaıdy Almaty-akshamy.kz. 24.kz-ke silteme jasap.
Otandasymyz úshin onlaın rejımde uıymdastyrylǵan baıqaýda top jarý ońaı bolmapty. Internettegi aqaýlarǵa baılanysty ózi oryndaǵan shyǵarmany birneshe márte qaıta jazýǵa týra kelgen. Biraq jeńiske degen jigeri alǵa jetelegen jas aqyry ózin moıyndatyp, bas júldege laıyq dep tanyldy. Bul bıtboks sheberiniń aldaǵy chempıonattarda baq synaýyna múmkindik beredi eken. Bıtboksıng – bul daýys, aýyz ben erin jáne tildiń kómegimen túrli áýenderdi shyǵarý óneri. Alǵash ret Amerıkada paıda bolyp, keıin basqa qurlyqtarǵa taralǵan. Eldar Ǵabdýllın bıtbokspen 2015 jyldan beri aınalysa bastapty. Basynda ónerdiń qaı túrin tańdasam dep kóp oılandym. Keıin dál osy janrdyń janyma jaqyn ekenine kózim jetti, - deıdi ol.
«Teledıdardan kórdim, bir bend sıaqty, grýppa jınaldy sosyn. Jyldam týtoırl istep, pp bochka, ts-hled, tshsh hed, sonyń bárin jyldam úırenip alyp, osymen aınalysyp kóreıin dep oıladym», - dedi bıtboksten álem chempıony Eldar Ǵabdýllın.
Eldardyń eshqandaı mýzykalyq bilimi joq. Degenmen úzdiksiz izdenistiń arqasynda jańa janrdy jyldam meńgerdi. Tis pen tildiń arasynan shyǵatyn túrli dybysty bir júıege túsirip, ózindik rıtmıkalyq baǵytyn tapty. Álemdik deńgeıdegi bıtbokserlerdi moıyndatty. Bıtbokstyń elimizde keń tarala qoımaǵanyn eskersek, jeńistiń de ońaı kelmegeni túsinikti