Aqmola oblysy Aqkól aýdanyndaǵy Keńes aýylynyń 5-synyp oqýshysy Albına Aıdarhanova ustazymen birge qazaq dalasynyń hosh ıisi saqtalǵan átir shyǵardy.
Mektep oqýshysynyń aıtýynsha, ony erekshe hosh ıis jasaýǵa Sultan Beıbarys týraly ańyzdaǵy «Jýsanda týǵan jerdiń ıisi bar» degen qanatty sóz shabyttandyrǵan.
«Osyndaı sózdi estigennen keıin, týǵan jerdiń ıisi bar átirdi jasap shyǵarǵym keldi. Bul ıisti shyǵarýda men ejelgi shyǵý tegimizdi zerdeledim» , - deıdi Albına Aıdarhanova.
Oqýshy óz jumysynda tabıǵı ıngredıentterdi paıdalanǵan. Parfúmerıa jasaýdaǵy negizgi ónim - týǵan ólkeniń qasıetti juparyna aınalǵan qarapaıym jýsan.
«Biz úı jaǵdaıynda átir jasaý tásilderin zerttedik. Alǵan bilimderimizdi praktıkada qoldaný barysynda jýsannyń san túrin anyqtadyq. Eger átirdiń negizgi notasy retinde gúlder qoldanylsa, biz onyń ornyna qarapaıym jýsandy tańdadyq. Sebebi onyń tunbasy tábetti jaqsartady, asqazan-ishek joldarynyń qyzmetin nyǵaıtady, júıke júıesin tynyshtandyrady, túrli shanshý men qurysýlardy, aýyrsynýdy basady, tipti tynysh uıqyǵa septigin tıgizedi», – deıdi joba jetekshisi, bastaýysh synyp muǵalimi Jupar Ahmetova.
Aıta keteıik, bul hosh ıis «Elim-aı» dep atalady. Jas ónertapqyshtyń aıtýynsha, átirdiń ataýy elimizdiń mádenıetine degen súıispenshilikpen baılanysty. Besinshi synyp oqýshysy jaqynda ótken ǵylymı jobalar baıqaýynda óz jumysyn qorǵap, «Hımıa, bıologıa» seksıasynda júldeli 3 oryndy ıelendi.