«Qazaq Astyq Group» Abaı oblysynda tazartylǵan ósimdik maıyn óndiretin jańa jelini salý jobasyn júzege asyrýda.
Kúnine 200 tonna tazartylǵan maı shyǵaratyn óndiristik jeliniń iske qosylýy 2025 jylǵa josparlanǵan, dep habarlaıdy aqshamnews.kz.
ASHm málimetinshe, bul joba kompanıanyń óndiristik qýatyn keńeıtý jáne ónim kólemin jylyna 72 myń tonnaǵa deıin arttyrýdaǵy mańyzdy qadam bolmaq.
Jobanyń jalpy ınvestısıa kólemi 8,3 mlrd teńgeni quraıdy. Jańa óndiris táýligine:
•522 tonna ósimdik maıyn,
•431 tonna shrotty,
•2,6 tonna fosfatıdti konsentratty,
•36 tonna túıirshiktelgen qaýyzdy óńdeýge múmkindik beredi.
Óndiristik jeli táýligine 1200 tonna kúnbaǵys, sondaı-aq 800 tonna raps pen zyǵyr tuqymyn qaıta óńdeýge baǵyttalǵan.
Shıkizattyń negizgi jetkizýshileri otandyq aýyl sharýashylyǵy óndirýshileri men Reseıden kelgen ımporttaýshylar bolmaq. Jańa keshenniń iske qosylýy kompanıaǵa ishki naryqtyń tazartylǵan kúnbaǵys maıyna degen suranysyn tolyq qamtamasyz etip qana qoımaı, eksporttyq jetkizilimderdi de jolǵa qoıýǵa múmkindik beredi.
Daıyn ónim myna elderge eksporttalatyn bolady: Ázirbaıjan, Belarýs, Grýzıa, Úndistan, Italıa, Qytaı, Qyrǵyzstan, Latvıa, Polsha, Reseı, Tájikstan, Ózbekstan jáne Estonıa.
Óndiristi keńeıtý men jańǵyrtýǵa baǵyttalǵan bul joba óńirdiń agroónerkásiptik keshenin damytýǵa jáne qazaqstandyq ónimderdiń halyqaralyq naryqtaǵy úlesin arttyrýǵa aıtarlyqtaı úles qospaq