Ekobelsendilerdi Almaty aýasynyń lastanýy alańdatyp otyr
Ekologıa belsendileri Almaty qaterli isik, ókpe aýrýlary boıynsha álemde aldyńǵy qatarda tur dep dabyl qaǵýda. Munyń basty sebebi – aýa baseıniniń lastanýy. Qalyń qara tútin Almaty aspanyn torlap turady, dep habarlaıdy Almaty-akshmy.kz
Zıandy zattardyń basym bóligi avtomobılderden shyǵady. Sebebi – kóbi eski.
Ekologıa departamenti mamandarynyń aıtýynsha, qoǵamdyq kólikter de tolyǵymen gazǵa aýystyrylmaı otyrǵan kórinedi.
«Almatydaǵy jeke turǵyn úı sektory túpkilikti tabıǵı otynǵa aýyspaıynsha, qalanyń aýasy tazarmaıdy. Gazben júretin qoǵamdyq kólik sanyn da úsh ese arttyrý qajet», – deıdi ekologtar.
Áıtpese, kún saıyn qalanyń tynysy tarylyp, aýa lastanyp barady. Shaharda kóp qabatty úı qurylysy qarqyn alǵandyqtan, jeldený de nasharlap otyr.
«Almaty qalasynyń kire beristerinde 20-dan asa ekopost jumys jasaıdy. Olardyń jumysy áli tıimsiz. Óıtkeni keıbir jaýapty mamandar ol jerde jumysyn tıisti deńgeıde jasamaı jatyr. Kólikterden kók tútin, qara tútin býdaqtaǵan kólikter, ásirese, júk kólikteri ary-beri saýlap júr kúndelikti. Almaty qalasynda 700 myńnan asa kólik bar. Bizdiń esebimizshe, 30 paıyzdan astamy ekologıalyq talaptarǵa sáıkes kelmeıdi», - deıdi Almaty qalasy boıynsha memlekettik ekologıalyq ınspektor Dinmuhammed Lesbekov.
4 jyl buryn Almaty álemdegi eń las 100 qalanyń qatyryna endi. Al «Qazgıdromet» mekemesiniń málimetinshe, qalanyń lastaný ındeksi 7 balǵa jetti. Bul atmosferalyq aýanyń óte nashar ekenin kórsetedi. Almatynyń joǵarǵy bóligine bıik úıler kóp salynýda. Ondaı ǵımarattar onsyz da oıpatta turǵan shahardyń aýa almasý prosesine kedergi jasaıdy. Turǵyndar tarapynan aryz-shaǵym jıi aıtylǵanymen, jaǵdaı jaqsarmaı otyrǵany qynjyltady.
Almatyda jylyna 122 myń tonna zıandy qaldyq aýaǵa taraıdy. Ekologıany jaqsartý úshin «Jol kartasy» ázirlenip, kógaldandyrýdy ulǵaıtý jospary bekitildi. Aldaǵy eki jylda qalada 3 mln kóshet otyrǵyzylmaq.
«Degenmen kólik aǵynyn rettemeı, ekologıalyq beket jumysyn qatańdatpaı, qurylysty saýatty júrgizbeıinshe, másele sheshilmeıdi», - deıdi ekologtor.