Almatylyq dáriger skrınıngtiń mańyzy jaıly áńgimelep berdi.
"Qaterli isiktiń aldyn alý maqsatynda josparly skrınıngterden ýaqtyly ótip turý qajet", - deıdi Almaty onkologıalyq ortalyǵynyń klınıka-dıagnostıka bólimi meńgerýshisi Náılá Aqjolova, dep habarlaıdy Almaty-akshamy.kz
Onkologıalyq syrqat kóp jaǵdaıda biraz ýaqytqa deıin eshqandaı belgi bermeıdi, onyń qaýiptiligi de osynda. Ádette aýrý sımptomdary úshinshi nemese tórtinshi satyda ǵana biline bastaıdy. Sondyqtan qaterli isiktiń aldyn alý maqsatynda josparly skrınıngterden ýaqtyly ótip turý qajet, deıdi Almaty onkologıalyq ortalyǵynyń klınıka-dıagnostıka bólimi meńgerýshisi Náılá Aqjolova.
Aıtýynsha, qaterli isik uzaq ýaqyt boıy qalyptasyp jetiledi. Sol sebepti erte anyqtalǵan jaǵdaıda aýrýdyń asqynýyna jol bermeı, ýaqtyly em-dom jasaýǵa múmkindik bar.
«Eń aldymen, der kezinde jasalǵan dıagnostıka obyrdy bastapqy satyda anyqtap, naýqasty emdep jazýǵa múmkindik beretinin aıtqym keledi. Bastapqy satysynda qaterli isikten qulan-taza aıyǵyp ketýge bolady, – deıdi maman. – Al úshinshi, tórtinshi satyda em-domnyń aýyr túrleri, hımıoterapıa, radıkaldy operasıalar qoldanylady. İsikpen kishigirim kezinde, paıda bolǵan kezde kúresken jeńil, úlkeıip ketkende ol pasıent ómirine qaýip tóndiredi».
Tıimdiligi dáleldengen skrınıng túrleri:
- 40 pen 70 jas aralyǵyndaǵy áıelderdi sút bezi obyryna mamografıalyq skrınıngten ótkizý – 2 jylda 1 ret;
- 30 ben 70 jas aralyǵyndaǵy áıelderdi jatyr moıny obyryna sıtologıalyq skrınıngten ótkizý – 4 jylda 1 ret;
- 50 men 70 jas aralaǵynda qan arqyly, kolonoskopıa ádisimen toq ishek/tik ishek obyryna tekserý – 2 jylda 1 ret;
Osy jyldyń 6 aıynda Almaty qalasy boıynsha 2363 pasıentten qaterli isik anyqtalyp, dıspanserlik esepke alynǵan. Qurylymdyq turǵydan alǵanda, birinshi orynda sút bezi obyry, ekinshi – kolorektaldy obyr, úshinshi – ókpe obyry, tórtinshi orynda – asqazan obyry tur.
Esterińizge sala ketsek, turǵyndar skrınıngten tirkelgen emhana arqyly ótedi. Skrınıngke ýchaskelik medbıke shaqyrýy tıis. Josparly tekserýden ótetin jasqa jetken azamattar emhanaǵa ózderi habarlassa da bolady. Sonymen qatar, «Halyq densaýlyǵy jáne densaýlyq saqtaý júıesi týraly» kodekstiń 87-babyna sáıkes, jumys berýshiler skrınıgten ótetin jumyskerlerdi bir kúnge jumystan bosatýǵa mindetti.