Keleshekte qazirgi ómirimiz týraly aýqymdy kitap jazý oıymda bar.
Memleket basshysy Qasym-Jomart Toqaev «QAZAQSTAN» telearnasyna bergen suhbatynda qazirgi ómir týraly aýqymdy kitap jazatynyn aıtty, dep habarlaıdy Almaty-akshamy.kz QazAqparatqa silteme jasap.
«Shyǵarmashylyǵyńyzǵa qatysty taǵy bir suraq. Siz negizinen, dıplomatıa, syrtqy saıasat týraly birneshe kitap jazdyńyz. Solardyń ishinde Elbasynyń tulǵasyna arnalǵan «Ol tarıhty jasap jatyr» degen týyndyńyz bar. Qazirgi tańda sol kitapty jazǵanyńyzǵa ókinbeısiz be? Budan basqa, jańa kitaptar jazý josparyńyzda bar ma?» - dep suraq qoıdy jýrnalıs Jaına Slambek.
«Ókinbeımin. Tuńǵysh Prezıdentimizdiń eńbegi týraly kitapqa kelsek, qazaqta «Ótken iske ókinbe» degen sóz bar. Men kóptegen oqıǵaǵa kýá bolǵan adammyn. Sondyqtan, qaǵazǵa túsirgendi jón kórdim. Oqyrmandardyń pikirinshe, kitaptarym joǵary deńgeıde jazylǵan. Mysaly, áli kúnge deıin stýdentter meniń kitaptarymnan qajetti maǵlumatyn alyp, paıdalanyp júr», - dep jaýap berdi Qasym-Jomart Toqaev.
Sonymen birge, Prezıdent aldaǵy josparlary týraly aıtyp berdi. «Keıbir oılarymdy túrtip qoıyp, kúndelik jazatynym bar. Múmkin, bolashaqta qajet bolar. Keleshekte qazirgi ómirimiz týraly aýqymdy kitap jazý oıymda bar. Amandyq bolsa jazamyn», - dedi Q. Toqaev.