QR Prezıdenti Qasym-Jomart Toqaev «Qazaqstan» telearnasyna bergen suhbatynda halyqtyń arasyndaǵy Elbasy tulǵasyna qatysty pikirtalastar týraly paıymyn bildirdi, dep habarlaıdy Almaty-akshamy.kz 

«Máselege jan-jaqty qaraıtyn bolsaq, halyq narazylyǵynyń astarynda ótkir áleýmettik másele jatyr. Halyqtyń kóbiniń áleýmettik jaǵdaıy tómen. Bul – aqıqat. Memlekettiń tutas baılyǵy az ǵana toptyń qolynda. Teńsizdik beleń alýda. Narazylyqtyń túp-tamyry osydan bastaldy. Bul másele týraly men Parlamentte, basqa da jıyndarda aıttym. Ókinishtisi, azamattardyń narazylyǵyn lańkester men qylmyskerler paıdalanyp ketti. Buǵan bárimiz kýá boldyq. Rasynda, áleýmettik jelide Tuńǵysh Prezıdentimiz týraly ártúrli oılar aıtylyp, jazylyp jatyr. Qansha adam bolsa, sonsha pikir bolady», - dedi Memleket basshysy.

Sondaı-aq, Nursultan Nazarbaevtyń 30 jyldyq eńbegin joqqa shyǵarýǵa bolmaıdy dep esepteıtinin basa aıtty.

«Tarıhqa qıanat jasamaý kerek. Nursultan Nazarbaev – memleketimizdiń irgesin qalaǵan, memlekettigimizdi nyǵaıtýǵa zor úles qosqan tulǵa. Onyń qyzmetine ádil baǵa berýge mindettimiz. Tuńǵysh Prezıdenttiń kemshilikteri bolsa, odan jas basshylar sabaq alýy qajet. Qańtar oqıǵasy elimizge de, meniń ózime de úlken sabaq bolǵany sózsiz. Tıisti qorytyndy jasaldy. Qazir elimizde bolyp jatqan saıası sheshimder − sonyń nátıjesi. Aldymyzda óte kóp jumys bar. Muny barlyǵy kórip, bilip otyr dep oılaımyn», - dedi Prezıdent.