Kezdesýler sheteldik ınvestorlar keńesiniń XXXIV otyrysynyń qarsańynda ótti.
Memleket basshysy Chevron korporasıasynyń atqarýshy vıse-prezıdenti Djeıms Djonsonmen, Exxon Mobil korporasıasynyń aǵa vıse-prezıdenti Nıl Chapmanmen, sondaı-aq Qazaqstannyń Kanadadaǵy qurmetti konsýldary – kanadalyq Cameco ýran kompanıasynyń prezıdenti Tımotı Gıtselmen jáne Condor Petroleum kompanıasynyń prezıdenti Don Strúmen jeke-jeke kezdesý ótkizdi, dep habarlaıdy Almaty-akshamy.kz Aqordaǵa silteme jasap.
Djeıms Djonsonmen áńgimelesý barysynda Qasym-Jomart Toqaevqa korporasıanyń elimizde atqaryp jatqan jumystarynyń qazirgi nátıjeleri men aldaǵy kezeńge arnalǵan jospary týraly málimet berildi. Atap aıtqanda, Teńiz ken ornyn bolashaqta keńeıtý jobasy boıynsha qurylys-montaj jumystaryn tezirek aıaqtaý máselesi sóz boldy. Sonymen qatar Qarashyǵanaq ken ornynyń óndiris qýatyn arttyrý máselesi, Qazaqstanda otandyq ónimderdi qoldaýǵa jáne qorshaǵan ortany qorǵaýǵa baǵyttalǵan Chevron korporasıasynyń tikeleı ınvestısıa salatyn qorynyń qyzmeti talqylandy.
Nıl Chapman Memleket basshysyna Qarashyǵanaq ken ornyndaǵy gaz óńdeý zaýyty qurylysynyń barysy, Teńiz ken ornynan eksporttalatyn gaz kólemin ishki naryqqa qaıta tasymaldaý jáne balama baǵyttar arqyly Qazaqstan munaıyn jetkizý múmkindikteri jóninde aıtty.
Tımotı Gıtselmen jáne Don Strúmen áńgimelesý kezinde Qazaqstanda birlesken ınvestısıalyq jobalardyń júzege asyrylý barysy sóz boldy.
Atap aıtqanda, Cameco kompanıasynyń prezıdenti Qasym-Jomart Toqaevqa elimizdegi ýran kompanıasynyń jumysy men aldaǵy jospary jóninde málimet berdi. Condor Petroleum kompanıasynyń prezıdenti suıytylǵan tabıǵı gaz óndiretin modýldi zaýyttar salý jospary jóninde málimet berdi.
Sonymen qatar «Qazaqstan – Kanada» iskerlik keńesiniń jumysy aıasynda Qazaqstan men Kanada arasyndaǵy yntymaqtastyqty damytýdyń perspektıvalaryna nazar aýdaryldy.