Memleket basshysy Qorǵanys mınıstri Rýslan Jaqsylyqovty qabyldady
Prezıdent – Qazaqstan Respýblıkasy Qarýly Kúshteriniń Joǵarǵy Bas qolbasshysy Qasym-Jomart Toqaevqa qorǵanys vedomstvosynyń bıylǵy atqarǵan qyzmeti týraly esep berildi.
Memleket basshysyna bólimshelerdiń jaýyngerlik daıyndyǵy, qarýly kúshter qataryna kúzgi shaqyrý naýqanynyń nátıjeleri, sondaı-aq áskerı qyzmettegi tártip pen qaýipsizdikti nyǵaıtýǵa, áskerı qyzmetshilerdiń áleýmettik mártebesi men jalaqysyn arttyrýǵa baǵyttalǵan sharalar jóninde baıandaldy.
Armıanyń jaýyngerlik áleýetin kezeń-kezeńimen arttyrý jáne áskerdi daıarlaýdyń jańa tásilderine kóshý máselelerine erekshe nazar aýdaryldy.
Rýslan Jaqsylyqov memlekettik qorǵanys tapsyrysynyń oryndalý barysy týraly baıandap, áskerdiń qarý-jaraq pen tehnıkanyń jańa úlgilerimen, atap aıtqanda, ushqyshsyz basqarylatyn avıasıalyq júıelermen jáne radıoelektrondyq kúres keshenderimen jaraqtandyrylyp jatqanyn jetkizdi. Budan bólek, jaýyngerlik mashınalardy jáne baılanys quraldaryn jańǵyrtý, rasıonalızatorlyq jumysty jandandyrý, sondaı-aq áskerı ınfraqurylymdy damytý máseleleri talqylandy.
Qasym-Jomart Toqaev elimizdiń bitimgerlik kontıngentiniń BUU aıasynda Golan jotalarynda atqaryp jatqan qyzmetiniń mańyzdy ekenin atap ótti.
Kezdesý sońynda Joǵarǵy Bas qolbasshy Qasym-Jomart Toqaev mınıstrge otandyq qorǵanys kásiporyndarymen ózara yqpaldastyqty jandandyrý, aýmaqtyq qorǵanys pen arnaıy operasıa kúshterin damytý, áleýmettik-quqyqtyq jumysty kúsheıtý jóninde naqty tapsyrmalar berdi.