Memleket basshysy kólik-tranzıt áleýetin damytý jóninde keńes ótkizdi
Prezıdenttiń tóraǵalyǵymen elimizdiń kólik-tranzıttik áleýetin damytý jóninde keńes ótti. Jıynǵa Úkimet basshylyǵy, salalyq mınıstrlikter men vedomstvolardyń, ulttyq kompanıalardyń basshylary qatysty, dep habarlaıdy Almaty-akshamy.kz.
Qasym-Jomart Toqaev kólik-logıstıka salasynyń Qazaqstan ekonomıkasynda erekshe ról atqaratynyn atap ótti. Onyń aıtýynsha, óńirlerdiń ózara qarym-qatynasyn jandandyrý úshin bul salanyń mańyzy zor. Degenmen geosaıası jaǵdaı men sanksıalyq teketires dástúrli kólik-logıstıka jelisin ózgeriske ushyratty.
Jıyn barysynda qarym-qatynastar men júk jetkizetin balama baǵyttardy, sondaı-aq tasymaldaý isin ártaraptandyrýdy pysyqtaý qajettigi aıtyldy.
Prezıdenttiń pikirinshe, otandyq ónimniń eksportqa qaýipsiz ári úzdiksiz shyǵarylýyn qamtamasyz etý úshin keshendi sharalar qabyldaý qajet. Memleket basshysy elimizdiń Ortalyq Azıa aımaǵyndaǵy kóshbasshylyǵyn saqtap, Qazaqstandy senimdi tranzıttik hab retinde damytý kerek ekenin aıtty. Osy maqsatta balama temirjol baǵyttaryn qalyptastyrý qajet. Bul jerde Dostyq – Moıynty, Baqty – Aıagóz, Maqtaaral – Darbaza jobalaryn júzege asyrý, Almaty qalasyn aınalyp ótetin temirjol jelisin salý jóninde sóz bolyp otyr.
Qasym-Jomart Toqaev temirjol parkiniń jumysyn jandandyrý jáne joldarǵa kúrdeli jóndeý júrgizý jóninde sharalar qabyldaýdy tapsyrdy.
– Otandyq temirjol salasynda mashına jasaý isin damytýǵa basa mán berý qajet. Onyń alǵysharttary bar. Qazaqstandyq óndirýshilerdi belsendi túrde qoldaý kerek, – dedi Memleket basshysy.
Qasym-Jomart Toqaev «Qazaqstan temir joly» ulttyq kompanıasyn tolyqtaı jańǵyrtý qajet dep esepteıdi.
– Qazaqstan temirjolyn ulttyq kólik-logıstıka kompanıasy retinde transformasıalaıtyn ýaqyt keldi dep oılaımyn. Bul QTJ-nyń mandaty men mindetterin keńeıtýge, kompanıaǵa elimizdiń kólik-tranzıt áleýetin damytý jumystaryn keshendi túrde júrgizýge múmkindik beredi, – dedi Prezıdent.
Prezıdent teńiz arqyly tasymaldaý isin damytýǵa erekshe nazar aýdardy.
– Qazaqstan teńiz arqyly tasymaldaý áleýetin tolyq paıdalanǵan emes. Qazir zaman basqa. Úkimetke porttarymyzdy Kaspıı teńiziniń jetekshi habtarynyń birine aınaldyra otyryp, transformasıalaý jóninde strategıalyq mindet júktedim. Teńiz flotyn nyǵaıtyp, Aqtaý portynda konteınerlik hab qurý qajet degen usynyspen tolyq kelisemin, – dedi Memleket basshysy.
Qasym-Jomart Toqaev munaı tasymaldaý isin ártaraptandyrýdy taǵy bir mańyzdy mindet retinde atap ótti.
– Transkaspıı baǵdary basym baǵyt sanalady. «QazMunaıGazǵa» ony júzege asyrýdyń ońtaıly nusqasyn, sonyń ishinde Teńiz jobasynyń ınvestorlaryn tartý múmkindigin pysyqtaýdy tapsyramyn. Úkimet «Samuryq-Qazynamen» birlesip, Atyraý – Keńqıaq jáne Keńqıaq – Qumkól munaı qubyrlarynyń qýatyn arttyrý jóninde sharalar qabyldaýy qajet, – dedi Prezıdent.
Avtojol ınfraqurylymyn damytý máselesi de mańyzdy salalardyń biri. Memleket basshysynyń aıtýynsha, eń aldymen, qurylysy bastalǵan magıstraldy baǵyttardaǵy (Aqtóbe – Qandyaǵash – Maqat, Atyraý – Astrahan, Almaty – Qaraǵandy jáne Taldyqorǵan – Óskemen) qaıta jańartý jumystaryn ýaqytyly ári sapaly aıaqtaý qajet.
Sonymen qatar Prezıdent búdjet qarajatyn tıimdi paıdalaný jáne otandyq kompanıalardy keńinen tartý qajet ekenine nazar aýdardy.
– Jobalardy júzege asyrý barysynda búdjetti barynsha tıimdi paıdalaný jáne otandyq ónimderdiń kólemin arttyrý basty qaǵıdat bolýy kerek, – dedi Memleket basshysy.
Budan bólek Úkimetke jyl sońyna deıin kedendik rásimdeý úderisin jáne shekaralyq baqylaýdy tolyq avtomattandyrý tapsyryldy.
Jıyn barysynda Indýstrıa jáne ınfraqurylymdyq damý mınıstri Qaıyrbek Óskenbaev, Energetıka mınıstri Bolat Aqsholaqov, «Qazaqstan temir joly» UK» AQ Basqarma tóraǵasy Nurlan Saýranbaev baıandama jasady. Sondaı-aq talqylaýǵa Premer-Mınıstr Álıhan Smaıylov, Premer-Mınıstrdiń orynbasary – Qarjy mınıstri Erulan Jamaýbaev, «QazMunaıGaz» UK» AQ Basqarma tóraǵasy Maǵzum Myrzaǵalıev qatysty.