Qazaqstan Prezıdenti HHİ ǵasyrdaǵy tatý kórshilik jáne odaqtastyq týraly sharttyń 10 jyldyǵy qarsańynda ótip jatqan Reseı Prezıdentiniń resmı saparynyń mán-mańyzy aıryqsha ekenin atap ótti, dep habarlaıdy almaty-akshamy.kz.
– Reseı – Qazaqstannyń strategıalyq seriktesi jáne odaqtasy. Ortaq tarıhqa, berik dostyqqa, ózara qurmet pen senimniń myzǵymas qundylyqtaryna súıene otyryp, biz kóptegen sala boıynsha ózara múddeni júzege asyrýdyń aıqyn dáleli sanalatyn memleketaralyq qatynasty jolǵa qoıdyq. Osy múmkindikti paıdalana otyryp, Qazaqstan Reseımen aradaǵy jan-jaqty yntymaqtastyqty odan ári nyǵaıtýdy kózdeıtin strategıalyq baǵytqa beıildi ekenin rastaǵym keledi, – dedi Qasym-Jomart Toqaev.
Memleket basshysynyń aıtýynsha, kelissózder barysynda saýda-ekonomıkalyq jáne ınvestısıalyq yqpaldastyqqa erekshe mán berildi.
– Reseı Qazaqstannyń iri saýda-ekonomıkalyq seriktesi mártebesin senimdi túrde saqtap keledi. Sońǵy úsh jylda elderimiz arasyndaǵy ózara saýda kólemi 30 paıyzdan astam ósti. Byltyr taýar aınalymy, Qazaqstan statısıkasy boıynsha, 27 mıllıard dollardy qurady. Bul – rekordtyq kórsetkish. Bıyl da oń dınamıka saqtalyp otyr. Segiz aıdyń qorytyndysy boıynsha saýda-sattyq kólemi 17 mıllıard dollarǵa jetti. Jalpy, ózara taýar aınalymyn odan ári arttyrý úshin zor múmkindik bar. Osy oraıda eki eldiń isker toptary arasyndaǵy baılanystardyń aıtarlyqtaı jandanǵany baıqalady. Reseılik kompanıalar Qazaqstan ekonomıkasyndaǵy jetekshi ınvestorlardyń bestigine kiredi. Olar jalpy 20 mıllıard dollardan astam ınvestısıa saldy. Osy jyldyń birinshi jartyjyldyǵynda ǵana Qazaqstan ekonomıkasyna tartylǵan reseılik ınvestısıa kólemi bir mıllıard dollardan asty. Bul ótken jylǵy deńgeıden 20 paıyzǵa kóp. Óz kezeginde Qazaqstannyń Reseıge salǵan ınvestısıasynyń kólemi 6 mıllıard dollarǵa jetti. Bul ekijaqty proses ekeni qýantady, – dedi Memleket basshysy.