Eki el arasyndaǵy saýda 31 mlrd dollardan asty
Qasym-Jomart Toqaev eń áýeli memlekettik saparmen kelýge shaqyryp, qurmetpen qarsy alǵany úshin QHR Tóraǵasy Sı Szınpınge shynaıy rızashylyǵyn bildirdi. Sonymen birge ony Qytaı Halyq Respýblıkasynyń Tóraǵasy laýazymyna qaıta saılanýymen quttyqtady, dep habarlaıdy Almaty-akshamy.kz Aqordaǵa silteme jasap.
"Qazaqstan úshin Qytaı Halyq Respýblıkasynyń orny – erekshe. Bizdiń yntymaqtastyǵymyz myzǵymas dostyqqa jáne ózara qoldaýǵa negizdelgen. Ekijaqty qarym-qatynasty jandandyrý jolyndaǵy maqsatymyz – ortaq. Aımaqtyq jáne halyqaralyq qaýipsizdikti, ózara yqpaldastyqty nyǵaıtýdy kózdeıtin muratymyz da – bir. Biz úshin Qytaımen máńgilik ári jan-jaqty strategıalyq áriptestikti odan ári damytý óte mańyzdy", – dedi memleket basshysy.
Búginde Qytaı – Qazaqstannyń negizgi saýda seriktesteriniń biri. Byltyrǵy qorytyndy boıynsha ózara saýda-sattyq kólemi 30 jyldyń ishindegi rekordtyq deńgeıge jetip, 31 mlrd dollardan asty.
"Mundaı qarqynmen biz jaqyn arada taýar aınalymy kórsetkishin 35 mlrd dollarǵa deıin jetkizý maqsatyna qol jetkize alamyz dep oılaımyn. Sondyqtan 2030 jylǵa qaraı 40 mlrd dollarlyq mejeni belgileýdi usynamyn. Osy maqsatqa jetý úshin biz ózara saýda nomenklatýrasyn keńeıte alar edik». Qazaqstan Qytaıǵa jiberiletin aýyl sharýashylyǵy ónimderiniń eksportyn keńeıtýge múddeli. Tek byltyr aýyl sharýashylyǵy ónimderiniń ózara saýda-sattyq kólemi 780 mln dollardan asty. Qazaqstan burshaq daqyldaryn, joǵary sapaly ári ekologıalyq taza muzdatylǵan sıyr jáne qoı etin jetkizýge daıyn", dedi Qasym-Jomart Toqaev.
Prezıdent ekonomıkalyq áleýettiń júzege asyrylýy kóbinese kólik-tranzıt salasyna baılanysty ekenin aıtty.
"Bul jerde Sizdiń aýqymy jaǵynan biregeı «Bir beldeý – bir jol» bastamańyzdyń aıasyndaǵy tabysty yntymaqtastyǵymyzdy erekshe atap ótkim keledi. Osy jyldar aralyǵynda «Bir beldeý – bir jol» jobasyn birlesip júzege asyrýda eleýli nátıjege qol jetkizildi. Erteń Sıan qalasynyń qurǵaq portynda logıstıka ortalyǵy irgetasynyń onlaın rejımde qalanýy bizdiń kólik-logıstıka salasyndaǵy baılanystarymyzdyń taǵy bir belesi bolmaq. Kólik dálizderin ártaraptandyrý aıasynda Transkaspıı halyqaralyq kólik baǵdarynyń (THKB) áleýetin belsendi túrde paıdalanýdy usynamyn",- dedi Toqaev.