Arnaýly sesıa DDSU tarıhynda ekinshi ret ótkizilip otyr.
Memleket basshysy Dúnıejúzilik densaýlyq saqtaý assambleıasy arnaýly sesıasynyń qatysýshylaryna iltıpat bildirip, COVID-19 pandemıasyna qarsy kúrestiń asa mańyzdy ekenin atap ótti, dep habarlaıdy Almaty-akshamy.kz Aqordanyń resmı saıtyna silteme jasap.
«DDSU qoǵamdyq densaýlyq saqtaý jolyndaǵy osy asa kúrdeli jahandyq kúreste jetekshi ról atqardy. Uıymǵa múshe memleketterdiń densaýlyq saqtaý júıesi aýyr jaǵdaıdy bastan ótkerdi jáne qıyndyq áli de jalǵasyp jatyr. Koronavırýstyń jańa ári qaýipti shtammdary álem boıynsha tez tarala bastaǵandyqtan, aldaǵy aptalarda COVID-19 indetin juqtyrǵandar sany aıtarlyqtaı ósedi. Jýyrda Ońtústik Afrıka ǵalymdary anyqtaǵan «Omıkron» shtamy jańa qaýip tóndirip otyr», – dedi Qasym-Jomart Toqaev.
Prezıdenttiń aıtýynsha, pandemıa halyqaralyq qatynastarda kóptegen kemshilikti anyqtaǵan. Sondaı-aq daǵdarystyń áleýmettik-ekonomıkalyq saldary barlyq deńgeıdegi áleýmettik qurylymdardy jan-jaqty qaıta zerdeleýge májbúrledi. Pandemıa yntymaqtastyqqa jáne bıologıalyq syn-qaterlerge qarsy is-qımyldardyń meılinshe tıimdi júıesine negizdelgen jańa jahandyq ádis kerek ekenin kórsetti.
«Eń aldymen, indet aldynda bizdi dármensiz qylǵan kemshilikterimizdi joıý qajet. Sondyqtan biz osy arnaýly sesıaǵa bir ǵana maqsatpen, ıaǵnı DDSU konvensıasyn ázirleý qajettigi men onyń tetikterin nemese pandemıaǵa jáne oǵan tótep berýge daıyndyqty qamtamasyz etý jónindegi halyqaralyq qujatty qarastyrý úshin jınalyp otyrmyz. Daıyndyq jumystary men baıandamalary úshin Dúnıejúzilik densaýlyq saqtaý assambleıasynyń 74-otyrysynyń jumys tobyna alǵys aıtýǵa ruqsat etińizder. Qazaqstan pandemıaǵa daıyndyqty arttyrýǵa jáne tıisti sharalardy qabyldaýǵa baǵyttalǵan DDSU konvensıasyna joldanǵan usynystardy qoldaıdy», – dedi Memleket basshysy.
Qasym-Jomart Toqaev Qazaqstannyń DDSU-ny tolyq qoldaıtynyn atap ótip, bul uıymdy senimdi áriptes retinde qarastyratynyn aıtty. Memleket basshysy álemdik qaýymdastyqtyń koronavırýsqa qarsy kúresine uıymnyń bas dırektorynyń qosqan jeke úlesin joǵary baǵalady.
«Qazirgi pandemıa densaýlyq saqtaý salasyndaǵy erekshe tótenshe jaǵdaı bolyp sanalmaıdy. Daǵdarys memleketterdiń jáne ulttyq densaýlyq saqtaý júıeleriniń ishki qurylymdyq kemshilikterin kórsetip qana qoımaı, jahandyq deńgeıdegi kúrdeli ári qordalanǵan teńsizdikterdi aıqyndap berdi. Sondyqtan Qazaqstan vaksınalardyń álem boıynsha ádil taratylýyn qoldaıdy jáne oǵan belsendi túrde atsalysady. Biz 2022 jyldyń ortasyna qaraı jahandyq vaksınalaýdy qamtamasyz etý jónindegi DDSU-nyń COVID-19 indetine qarsy strategıasyn tolyq qoldaımyz», – dedi Prezıdent.
Memleket basshysy jıyn qatysýshylaryna QazVac vaksınasynyń ázirlenýi jáne onyń jańa «delta» shtamyna qarsy sátti modıfıkasıalanǵany jóninde aıtty. Qazaqstandyq vaksına óziniń tıimdiligin elimizde ǵana emes, Ortalyq Azıanyń basqa da memleketterinde dáleldedi.
«Kez kelgen aýyl nemese qaladaǵy sıaqty jahandyq deńgeıdegi bizdiń órkendeýimiz, ıgiligimiz densaýlyq jaǵdaıymyzǵa baılanysty. Al bizdiń densaýlyǵymyz yntymaqtastyqqa jáne ortaq syn-qaterge úılesimdi tótep berýge baılanysty. Men barlyq eldi kózdelgen maqsatqa qol jetkizý úshin Dúnıejúzilik densaýlyq saqtaý uıymy aıasyna birigýge shaqyramyn», – dedi Qasym-Jomart Toqaev.