Prezıdent tóraǵalyǵymen elimizdiń áleýmettik-ekonomıkalyq damýy jóninde keńes bastaldy
Memleket basshysy Qasym-Jomart Toqaevtyń tóraǵalyǵymen elimizdiń áleýmettik-ekonomıkalyq damýy jóninde keńes bastaldy, dep habarlaıdy Almaty-akshamy.kz QazAqparatqa silteme jasap.
Úkimet úıinde ótip jatqan jıynǵa Premer-Mınıstr, Parlament palatalarynyń spıkerleri, Prezıdentke tikeleı esep beretin memlekettik organdardyń basshylary, Úkimet músheleri, Astana, Almaty, Shymkent qalalarynyń, oblystar men aýdandardyń ákimderi, Senat pen Májilistegi parlamenttik fraksıalar men komıtetterdiń jetekshileri, oblystyq jáne aýdandyq máslıhattardyń tóraǵalary qatysýda.
Buǵan deıin Memleket basshysy áleýmettik mańyzy bar azyq-túlik taýarlarynyń baǵasyn turaqtandyrý jáne aýyl sharýashylyǵyn damytý, qosymsha quny joǵary qazaqstandyq taýarlardy eksportqa belsendi túrde shyǵarý jumystaryn jandandyrýdy tapsyrǵan edi.
«Jýyrda Májilis jáne máslıhat depýtattarynyń saılaýy ótti. Úkimet qaıta jasaqtaldy. Osylaısha, aýqymdy saıası ózgeristiń alǵashqy kezeńi aıaqtaldy deýge bolady. Biz bılik tarmaqtarynyń tepe-teńdigin ornyqtyrdyq. Endi elimizdegi qoǵamdyq-ekonomıkalyq qatynastardy qaıta qurýymyz kerek. Jurtshylyq bul reformalarǵa zor úmit artyp otyr. Sondyqtan biz naqty is-sharalarǵa basa mán berýge tıispiz. Men Parlament sesıasynyń ashylýynda zańnamalyq turǵydan sheshilýge tıis birqatar máseleni atap óttim. Al búgin áleýmettik-ekonomıkalyq saladaǵy maqsat-mindetterdi aıqyndap alýymyz kerek. Úkimet jáne barlyq deńgeıdegi ákimder soǵan súıenip jumys isteıtin bolady. Osy basqosýǵa máslıhattardyń ókilderi qatysyp otyr. Bul da – naqty saıası ózgeristerdiń nyshany. Atqarýshy jáne ókildi bılik arasynda tıimdi qarym-qatynas ornatý óte mańyzdy. Qajet bolsa, olar birin-biri tolyqtyryp, qoldap otyrýy kerek. Munyń bári memlekettik saıasatty tıimdi júzege asyrýǵa múmkindik beredi. Sondaı-aq el múddesin eskere otyryp sheshim qabyldaýǵa jol ashady», - dedi Memleket basshysy.