Premer-Mınıstr Memleket basshysyna Qazaqstannyń Eýrazıalyq ekonomıkalyq odaqqa tóraǵalyǵynyń basym baǵyttaryn iske asyrý barysy jóninde baıandady.
Qazaqstan prezıdenti Qasym-Jomart Toqaev Premer-Mınıstr Asqar Mamındi qabyldady, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaevqa elimizdegi sanıtarlyq-epıdemıologıalyq ahýal, áleýmettik mańyzy bar taýarlardyń baǵasyn turaqtandyrý boıynsha qabyldanyp jatqan sharalar, ınvestısıa tartý jáne ózge de áleýmettik-ekonomıkalyq damý máseleleri jóninde esep berildi.
Premer-Mınıstr epıdemıologıalyq ahýaldyń turaqtalǵanyn jáne COVID-19 indetin juqtyrý kórsetkishiniń tómendegenin atap ótti. Onyń aıtýynsha, sońǵy aıda koronavırýs juqtyrǵandar sany 2,4 esege, stasıonarlarda em alyp jatqandar 1,4 esege, ambýlatorıalyq jaǵdaıda emdelýshiler 1,8 esege azaıǵan.
Halyqqa vaksına salý jónindegi josparly jumystar jalǵasyp jatyr. Búginge deıin 8,7 mıllıonǵa jýyq adam ekpe alǵan. 22 qarashadan bastap búkil óńirde qaıta vaksınalaý jumystary bastaldy.
Prezıdentke áleýmettik mańyzy bar azyq-túlik taýarlarynyń baǵasyn turaqtandyrý jáne Inflásıaǵa qarsy sharalar keshenin júzege asyrý jumystary týraly málimet berildi.
Asqar Mamın Qasym-Jomart Toqaevqa Qazaqstannyń Eýrazıalyq ekonomıkalyq odaqqa tóraǵalyǵynyń basym baǵyttaryn iske asyrý barysy jóninde baıandady. Atap aıtqanda, ózara tıimdi kooperasıalyq jobalardy damytý, saýda-sattyq salasyndaǵy kedergilerdi joıý, kólik-logıstıkalyq yntymaqtastyqty nyǵaıtý, sıfrlyq tehnologıany engizý, saýda-ekonomıkalyq yqpaldastyqty keńeıtý jónindegi birlesken jumystar jandandy.
Úkimet basshysynyń málimetine sáıkes, qazirgi ýaqytta Eýrazıalyq ekonomıkalyq odaqtyń ishki naryǵyndaǵy kedergilerdiń 80 paıyzy joıylǵan. Odaqqa múshe memleketter arasyndaǵy taýar aınalymy bıylǵy 9 aıda 32,5 paıyzǵa artyp, 52 mıllıard dollarǵa jetti. Al úshinshi eldermen aradaǵy saýda 32,7 paıyzǵa ulǵaıyp, 596 mıllıard dollardy qurady.