Qarsy qozǵalys jolaǵyna shyǵý – jol júrý erejelerin óreskel buzýdyń eń qaýipti túrleriniń biri. Mundaı manevr basqa júrgizýshiler men jolaýshylardyń ómirine úlken qater tóndiredi, – dep habarlaıdy aqshamnews.kz.
Ókinishke oraı, qarsy jolaqqa shyǵýdan bolatyn jol-kólik oqıǵalary jıi qaıǵyly jaǵdaılarmen aıaqtalady: adamdar jaraqattanyp, keıde ómirden de aıyrylady. Qoldanystaǵy zańnamada mundaı tártip buzýshylyq úshin aýyr jaza qarastyrylǵan – júrgizýshi 6 aı merzimge kólik basqarý quqyǵynan aıyrylady. Alaıda bul da keıbir jaýapsyz júrgizýshilerdi toqtata almaı keledi. Máselen, bıylǵy jyldyń ózinde ǵana 236 júrgizýshi qarsy jolaqqa shyqqany úshin ákimshilik jaýapkershilikke tartyldy.
– Mysal retinde, Pavlodar qalasyndaǵy Toraıǵyrov kóshesinde tórt jolaǵy bar eki jaqty qozǵalys jolynda Toyota avtokóliginiń júrgizýshisi qarsy qozǵalysqa shyǵyp, jol saqshylarynyń nazaryna ilikti. Kináli tulǵaǵa qatysty is sotqa joldanyp, avtokólik arnaıy turaqqa qoıyldy, – dedi Pavlodar oblysy polısıa departamentiniń baspasóz qyzmeti.
Sondaı-aq polısıa qyzmetkerleri birjaqty qozǵalysy bar kóshelerde belgilengen jol belgileri men syzyqtaryn elemeý de jaýapkershilikke ákep soǵatynyn eskertedi.
Jol qaýipsizdigin qamtamasyz etý – ár júrgizýshiniń mindeti. Ásirese, balalar men oqý oryndarynyń mańynda, jaıaý júrginshiler ótkelderi men qoǵamdyq kólik aıaldamalarynyń janynda muqıat bolý qajettigin polısıa qyzmetkerleri taǵy da eske salady.
Jolda júrý erejelerin saqtaı otyryp, biz ózimizdiń jáne ózgelerdiń ómirin qorǵaımyz.