Almaty qalasynyń avıasıalyq kólik prokýratýrasynyń úılestirýimen Qazaqstannyń memlekettik shekarasy arqyly iri kólemde preparattardy zańsyz ótkizý faktisi anyqtaldy, dep habarlaıdy aqshamnews.kz.
Bir top adam aldyn ala sóz baılasyp, quramynda adam ómiri men densaýlyǵyna qaýipti zattar bar anabolıkter men steroıdterdi (QR Densaýlyq saqtaý mınıstriniń 2023 jylǵy 26 maýsymdaǵy № 120 buıryǵy) vıtamınder retinde jasyryp, Qazaqstannyń memlekettik shekarasy arqyly AQSH pen Eýropa elderine jóneltýdi josparlaǵan.
Jedel-izdestirý is-sharalary barysynda uıymdastyrýshylardyń preparattardy saqtap, býyp-túıýmen aınalysqan mekenjaıy tabyldy.
Tekserý nátıjesinde 206 myńǵa jýyq ampýla men tabletka, shprıster, jelimdeýge arnalǵan stanok, poshta konvertteri, sonymen qatar qutylarǵa arnalǵan ózdiginen jabysatyn japsyrmalar tárkilendi. Atalǵan azamattar ustalyp, olarǵa qatysty sot "úı qamaǵyna alý" bultartpaý sharasyn qoldandy.
Qazirgi ýaqytta sotqa deıingi tergeý júrgizilýde. QR QPK-niń 201-babyna sáıkes ózge málimetter jarıa etilmeıdi.