Parlament Májilisinde qarjy pıramıdalarynyń qyzmetine qarsy is-qımyl týraly zań jobalary maquldandy, dep habarlaıdy Almaty-akshamy.kz.
«QR keıbir zańnamalyq aktilerine qarjy naryǵy men qarjy uıymdaryn memlekettik retteýdi, baqylaý men qadaǵalaýdy kúsheıtý jáne qarjylyq (ınvestısıalyq) pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» jáne «QR Ákimshilik quqyq buzýshylyq týraly kodeksine qarjylyq (ınvestısıalyq) pıramıdalardyń qyzmetine qarsy is-qımyl máseleleri boıynsha tolyqtyrý engizý týraly» zań jobalaryn QR Parlamenti Májilisiniń depýtaty Iýrıı Lı tanystyrdy.
«Qaraýǵa usynylǵan zań jobalarynyń negizgi maqsaty – qoldanystaǵy zańnamadaǵy quqyqtyq olqylyqtardy joıý jáne qarjylyq (ınvestısıalyq) pıramıdalardy qurý jáne jarnamalaý úshin jaýapkershilikti qatańdatý arqyly alaıaqtyq qarjy pıramıdalarynyń keńinen taralýyna depýtattardyń jedel den qoıýy bolyp otyr», - dedi Iý. Lı.
Depýtat atalǵan zań jobalarynyń qandaı ózgerister usynatynyn túsindirdi:
- qarjy (ınvestısıalyq) pıramıdalaryn qurý jáne basqarý úshin sanksıalardyń joǵarǵy shegin arttyrý;
- qarjy (ınvestısıalyq) pıramıdalaryn jarnamalaǵany úshin qylmystyq jaýapkershilikti belgileý;
- sotqa deıingi tergep-tekserýdi bastaǵan İshki ister organdaryna nemese ekonomıkalyq tergeý qyzmetine qarjylyq (ınvestısıalyq) pıramıdalardy jarnamalaý týraly qylmystyq ister boıynsha tergeý jasaýyn aıqyndaý;
- qylmystyq is-áreketterdi ákimshilik quqyqbuzýshylyqtardan ajyratý;
- sondaı-aq, jeke jáne zańdy tulǵalardyń aqshasy men ózge de múlkin osyndaı qyzmetti júzege asyrýǵa quqyǵy joq tulǵalardyń paıdasyna tartýǵa qatysty qyzmetti jarnamalaýǵa tyıym salý.
Osylaısha, túzetýler Qylmystyq kodekske, Qylmystyq is júrgizý kodeksine, Ákimshilik quqyqbuzýshylyqtar týraly Kodekske jáne «Jarnama týraly» zańǵa qatysty bolady.
«Bastamashylyq jasalǵan túzetýler azamattardyń múliktik jáne múliktik emes quqyqtary men aktıvterin qorǵaý deńgeıin edáýir arttyrýǵa, qarjy (ınvestısıalyq) pıramıdalarynyń qyzmetin eskertýge, qarjy pıramıdalaryn qurý men olardy jarnamalaý kezindegi quqyqbuzýshylardyń is-áreketin neǵurlym naqty saralaýǵa múmkindik beretin jınaqy, naqty túzetýler bolyp sanalady. Joǵaryda baıandalǵandy eskere otyryp, qaralyp otyrǵan zań jobalaryn birinshi oqylymda qoldaýdy suraımyn», - dedi Iýrıı Lı.