Qazaqstandyq bankter endi azamattardyń shottary men ondaǵy qarajat qaldyqtary týraly derekterdi salyq organdaryna beredi. Bul retteýdi qarastyratyn buıryq jobasyn Qarjy mınıstrligi jarıalady, - dep habarlaıdy Aqshamnews.kz tilshisi.
Qujatta jańa esep berý formasy 2026 jylǵy 1 qańtardan bastap kúshine enetin jańa Salyq kodeksi aıasynda engizilgeni jazylǵan. Buıryq jobasy bıylǵy 29 qyrkúıekke deıin qoǵamdyq talqylaýda bolady.
Barlyq bank salyq organynyń suraýy boıynsha 10 jumys kúni ishinde mynadaı málimetterdi usynýǵa mindetti:
-
azamattyń bank shoty bar-joǵy;
-
ol shottardyń nómirleri;
-
shottaǵy qaldyq pen qarajat qozǵalysy.
"Bul tek múlik pen mindettemeler týraly deklarasıa tapsyrýǵa mindetti jeke tulǵalarǵa qatysty. Bankter úshin mundaı mindetteme 2018 jyldan beri bar. Bul jańa talap emes", – dep túsindirdi mınıstrlik Tengrinews.kz redaksıasynyń resmı saýalyna jaýap berip.
2025 jylǵy shildeden ne ózgerdi?
Salyq kodeksine jańa tarmaqtar (13-1 jáne 13-2) qosyldy. Endi bankter:
-
esepshottar, olardyń nómirleri jáne qaldyqtary týraly derekterdi tek múlik pen mindettemeler deklarasıasyn tapsyratyndarǵa ǵana emes, sondaı-aq kirister men múlik týraly deklarasıa tapsyratyndarǵa da berý;
-
qarajat qozǵalysy týraly derekterdi tek bir jaǵdaıda usyný: eger azamat jyl ishinde quny 20 000 AEK-ten asatyn (2025 jyly – 78,6 mln teńge) múlik satyp alyp, osyǵan baılanysty kiris týraly deklarasıa tapsyrýǵa mindettelse.
Osylaısha, buryn bankter tek múlik pen mindettemeler deklarasıasyn tapsyratyndar boıynsha derek berse, endi baqylaý aýqymy keńeıdi:
-
esepshottar men qaldyqtar týraly málimet kiris pen múlik deklarasıasyn tapsyratyndar boıynsha da beriledi;
-
al qarajat qozǵalysy týraly derek qymbat múlik satyp alǵan jaǵdaıda ǵana usynylady.
Bul ne úshin qajet?
Qarjy mınıstrliginiń málimetinshe, bul jańashyldyqtyń maqsaty – jappaı deklarasıalaý aıasynda azamattardyń kiristeri men múlkine baqylaýdy kúsheıtý. Salyq organdary iri mámilelerdi qashyqtan qadaǵalap, olardy tapsyrylǵan deklarasıalarmen salystyra alady. Bul ádis ádil salyq salýǵa, búdjet túsimin arttyrýǵa jáne kóleńkeli ekonomıkany azaıtýǵa baǵyttalǵan.