Qazaqstannyń Densaýlyq saqtaý mınıstrligi 2021 jylǵy 15 aqpandaǵy "Emdelý úshin birjolǵy zeınetaqy tólemderin paıdalaný qaǵıdalaryn bekitý týraly" buıryǵyna ózgerister engizip jatyr. Ózgerister zeınetaqy jınaqtaryn tis emdeýge paıdalanýǵa tyıym salýdy kózdeıdi, - dep habarlaıdy Aqshamnews.kz tilshisi.
Densaýlyq saqtaý mınıstrligi mundaı sheshim zeınetaqy jınaqtaryn stomatologıalyq qyzmetter arqyly zańsyz shyǵarý derekteriniń kóptigine baılanysty qabyldanǵanyn túsindirdi.
"Jobada tis protezdeý jáne ımplantasıa sıaqty stomatologıalyq qyzmetterge birjolǵy zeınetaqy tólemderin paıdalaný normasyn alyp tastaý kózdelgen. Sheshim medısınalyq qujattardy qoldan jasaý jáne zeınetaqy jınaqtaryn maqsatsyz paıdalaný jaǵdaıynyń kóptep kezdesýine baılanysty qabyldandy", – delingen qujat jobasynda.
Taldaý nátıjeleri boıynsha, azamattardyń stomatologıalyq qyzmetterdi tóleýge bergen ótinimderi alaıaqtyq sqemalar arqyly birqatar klınıkalardyń paıdasyna shyǵarylǵan. Osyǵan baılanysty 15 qyrkúıekten bastap zeınetaqy qarajaty esebinen medısınalyq kómektiń bul túrin qarjylandyrýǵa ótinim qabyldaý toqtatyldy.
"Otbasy bank aqparaty boıynsha, 2021 jyldan 2025 jylǵy 20 tamyzǵa deıin enpf-otbasy.kz platformasy arqyly tek "Stomatologıalyq qyzmetter" maqsaty boıynsha 757 mıllıard teńgege 795 424 tranzaksıa júrgizilgen. Taldaý nátıjesi boıynsha, 222 mıllıard teńgeden astam qarjy TOP-20 stomatologıalyq klınıkaǵa baǵyttalǵan. Bul klınıkalardyń basym bóligi Qazaqstannyń iri qalalarynda ornalasqan", – dep habarlady vedomstvo.
Mán-jaıy
Buǵan deıin Densaýlyq saqtaý mınıstrligi "Ashyq NQA" portalynda stomatologıalyq qyzmetterdiń aqysyn tóleý úshin birjolǵy zeınetaqy tólemderin paıdalaný normasyn tolyqtaı alyp tastaý usynylǵan buıryq jobasyn jarıalaǵan bolatyn. Qujat qoǵamdyq talqylaýǵa shyǵaryldy.
Araǵa kún salyp, Otbasy bank stomatologıalyq qyzmetterge ótinim qabyldaýdy ýaqytsha toqtatqanyn habarlady. Bankte bul sheshimdi qarajatty maqsatsyz paıdalaný derekteriniń kóptigi jáne qujattardyń qoldan jasalýymen túsindirdi.