M.Áýezov atyndaǵy Qazaq ulttyq akademıalyq drama teatrynda Qazaqstan Respýblıkasy Táýelsizdiginiń 30 jyldyǵyna arnalǵan dástúrli «Qarashańyraq–2021» festıvali ótýde. Sharanyń maqsaty – teatr qyzmetiniń baǵyt-baǵdaryn aıqyndaýǵa, shyǵarmashylyq izdenisterdi júzege asyrýǵa, akterlik sheberlikti shyńdaýǵa baǵdar berý, dep habarlaıdy Almaty-akshamy.kz.
«Dástúrdi ardaqtaý – Serke syndy ulaǵatty ustazdardan úlgi alý degen sóz. Teatr óneriniń maıtalmandarynyń rýhyna arnalyp jasalyp jatqan festıvál jas urpaqqa úlken úlgi bolary sózsiz. Teatr qorjyny jańa qoıylymdarmen tolyǵýda. Bul degenimiz, bolashaq urpaqtyń sanaly da salmaqty, ádebıet pen ónerge qumar bolyp ósip kele jatqanynyń dáleli. Jastar arasynda uıymdastyrylǵan sharalar olardyń qıalyna qanat bitirip, bilikti maman bolýyna septigin tıgizip qana qoımaı, mádenıetimizdiń órkendeýine jol ashpaq», – deıdi Memlekettik syılyqtyń laýreaty Asanáli Áshimov.
Festıvál 1995 jyldan beri jyl saıyn uıymdastyrylady. Sońǵy jyldary teatr basshylyǵy ár festıváldi ómirden ótken sahna sańlaqtarynyń qurmetine arnap júr. Bul qazaq óneri has sheberleriniń rýhyna taǵzym etip, olardyń eńbekterin jas ónerpazdarǵa úlgi etý maqsatynda júrgizilýde.
«Bıyl jas rejıserlardyń eńbekteri baq synamaq. Olardyń ishinde álemdik klasıkterdiń aýdarmalary, ádepki baǵyttan ózgerek, jańasha stıldegi shyǵarmalary kórermen qaýymǵa usynylmaq. Sarapshylarymyz jastardyń eńbegin baǵalap, talanttar top jarady degen senimdemiz», – deıdi M.Áýezov atyndaǵy Qazaq ulttyq akademıalyq drama teatrynyń dırektory Erkin Jýasbek.
Dástúrli dodaǵa túsken qoıylymdar kóshin Oljas Janaıdarovtyń «Ekeýmiz» dramasy bastap, kórermenderdi bir serpiltip tastady. «Synǵa túsip jatqan «Peri qatyn» spektakliniń premerasyn Germanıadan oralǵan belgili rejıser, nemis dramatýrgıasynyń bilgiri marqum Bolat Atabaev aǵamyz tamashalap, óz baǵasyn bergen edi. Meniń oıymsha, biz ár halyqtyń mádenıetin, salt-sanasyn teatr óneri arqyly kórsetýge tıispiz. Ár adamnyń óz talǵamy, tanym-túısigi bolatyndaı, qoıylymdar men spektáklderde de ózgeshelik bolýy kerek», – deıdi M.Áýezov atyndaǵy Qazaq ulttyq akademıalyq drama teatrynyń rejıseri Elik Nursultan.
Joǵary rýhanıatty ornyqtyrýǵa umtylýdy, sahna óneriniń qoǵamǵa áser-yqpalyn arttyrý men dástúrli ulttyq qundylyqtarymyzdy jańǵyrta túsý arqyly jas urpaqty izgilik ıdeıalaryna tárbıeleýdi kózdeıtin festıvál aıasynda Sháken Aımanov, Elýbaı Ómirzaqov, Qapan Badyrov, Tańat Jaılybaevtardyń shyǵarmashylyq ǵumyryna arnalǵan arnaıy kórme kórsetildi.