Respýblıkanyń basym bóliginde jel kúsheıedi
«Qazgıdromet» RMK–sy qarashanyń 14-i kúngi kún raıy boljamyn jarıalady, dep habarlaıdy Almaty-akshamy.kz.
Kásiporynnyń boljamyna qaraǵanda, soltústik-batys sıklony Qazaqstan terıtorıasymen tez jyljı otyryp, elimizdiń soltústik jartysyna jaýyn-shashyn alyp keledi, qar jaýýy da múmkin. Respýblıkanyń basym bóliginde jel kúsheıip, soltústikte jaıaý burqasyn, kóktaıǵaq bolady, ońtústikte tuman túsedi.
Aqmola oblysynyń soltústigi men shyǵysynda kóktaıǵaq, jaıaý burqasyn soǵyp, jeldiń jyldamdyǵy sekýndyna 15-20 metrge deıin kúsheıedi.
Soltústik Qazaqstan oblysynyń soltústigi men batysynda tuman, kóktaıǵaq, jaıaý burqasyn, túnde ońtústik-batysynda jeldiń jyldamdyǵy 15-20 m/s-qa deıin kúsheıedi.
Qostanaı oblysynyń ońtústik-batysynda kóktaıǵaq, shyǵysynda jel sekýndyna 15-20 metrge deıin kúsheıip, jaıaý burqasyn soǵady.
Aqtóbe oblysynyń basym bóliginde túnde, kúndiz soltústik-shyǵysynda jaıaý burqasyn soǵady, kóktaıǵaq bolyp, soltústiginde jel 15-20 m/s jyldamdyqpen uıtqıdy.
Túrkistan oblysynyń basym bóliginde kúndiz jeldiń jyldamdyǵyn sekýndyna 15-20 metrge jetedi, taýly aýdandarynda ekpini 23 m/s bolady, soltústiginde shańdy daýyl turyp, túnde jáne tańerteń taýly aýdandary men taý bókterinde tuman túsedi.
Shyǵys Qazaqstan oblysynyń soltústik-shyǵysynda jaıaý burqasyn soǵady, batysynda jeldiń jyldamdyǵy sekýndyna 15-20 metrge jetedi.
Qaraǵandy oblysynyń batysy, soltústigi men ortalyǵynda kóktaıǵaq bolyp, jaıaý burqasyn soǵady, ońtústiginde tuman túsip, soltústigi men ortalyǵynda jel 15-20 m/s jyldamdyqpen uıtqıdy.
Jambyl oblysynyń soltústigi, ońtústik-batysy men taýly aýdandarynda jeldiń jyldamdyǵy sekýndyna 15-20 metrge jetedi, kúndiz ońtústik-batysynda jeldiń ekpini 23-28 m/s-ke deıin kúsheıedi, túnde jáne tańerteń taýly aýdandarynda tuman túsip, kóktaıǵaq bolady.
Kúndiz Qyzylorda oblysynyń ortalyǵynda, Pavlodar oblysynyń ońtústik-batysynda jel 15-20 m/s jyldamdyqpen soǵady.
Túnde Batys Qazaqstan oblysynyń shyǵysynda kóktaıǵaq kútiledi.