Keptelis kóp bolǵandyqtan jol apaty da jıi bolady.
Qarasaı aýdanyndaǵy kólik keptelisi halyqtyń narazylyǵyn týdyrdy, dep habarlaıdy Almaty-akshamy.kz
Qarasaı aýdanyndaǵy 7 shaqyrym joldy halyq eki saǵattap júrýge májbúr.
"Kóp jyl Altyn orda bazarynda kólik keptelisi boldy. Ol jerdiń jolyn jasap, keptelisti qalanyń syrtyna ǵana ysyryp qoıdy, sonymen is bitti qyldy. Myna 7-8 shaqyrymdy tańerteń 2 saǵat, keshke eki saǵat júremiz", - deıdi aýdan turǵyny Ǵubaıdolla Turapov.
Keptelis kóp bolǵandyqtan jol apaty da jıi bolady.
"Keptelis azaıady dep Almatynyń úlken aınalma jolyn saldy. Odan qaıyr joq. Eldiń bári qalaǵa qatynap jumys isteıdi. Jarty ómirimiz joldyń keptelisimen ketedi. Aýylda jumys joq. Bir kólik soqtyǵyssa birneshe shaqyrym kólik keptelisi bolady. Soǵylmaǵannyń ózinde bir attam jerdi saǵattap júremiz", - deıdi júrgizýshi Talǵat Smaıylov.
"Almaty - Bishkek" dep atalatyn bul avtojolda kúnine 70 myńnan astam kólik júredi. Degenmen tas jol negizi 40 myń kólikke arnalǵan. Bul joldyń problemaly ekenin oblystyq "Qazavtojol" mamandary da moıyndap otyr.
"Almaty-Bishkek" avtojolynyń 20-31 km boıynsha halyq kóp shaǵymdanady. Kólik apaty da jıi bolady. Bul problemany sheshý úshin eki kezeńdi jumystyń syzbasy ázirlendi. 6-8 jolaqty jol etip jasaý qarastyrylǵan. 4 burylma, 12 jerasty ótkeli salynyp, 1 kópir keńeıtiledi. Sý jiberetin 12 qubyr salynady", - deıdi "Qazavtojol" ulttyq kompanıasynyń Almaty oblystyq fılıalynyń ókilderi.
Vedomstvonyń málimetinshe, jol qurylysy jaqynda bastalady. Aýqymdy jumys halyqty mezi etken kólik keptelisin budan da kúrdelendire túsýi múmkin.