Onyń aıtýynsha, stýdentter harassmentke ushyraý yqtımaldyǵy óte joǵary top.
Májilis depýtaty Qaraqat Ábden otbasyndaǵy zorlyq-zombylyqtyń aldyn alý kezek kúttirmeı sheshetin máselege aınalǵanyn atap ótip, Premer-mınıstrdiń orynbasary Tamara Dúısenovaǵa saýal joldady, dep habarlaıdy Almaty-akshamy.kz
«Eldi eleń etkizgen sońǵy habarlar qoǵamdyq sanany dúr silkindirdi. Osy qorqynyshty jańalyqtar izimen harassment oqıǵalary da tez tarady. Jaqynda Astana medısına ýnıversıtetinde profesor-oqytýshynyń stýdentke jasaǵan jynystyq qysym faktisi anyqtaldy. Osydan keıin álimjettik kórgen stýdentter óz oqıǵalaryn áleýmettik jelide bólise bastady. Jeke ózime ártúrli oqý oryndarynyń stýdentterinen 100-den asa hat kelip tústi», - dep aıtty depýtat.
Qaraqat Ábden stýdentter harassmentke ushyraý yqtımaldyǵy óte joǵary top ekenin alǵa tartty.
«Jynystyq qysymǵa ushyraǵan elordalyq boıjetkenniń isimen tanysyp, bul salada kemshilikterdiń kóptigine anyq kózimiz jetip otyr. Dál búgin elimizdiń oqý oryndarynda qansha harassment oqıǵasy bolǵanyn dóp basyp aıtý qıyn. Sebebi statısıka júrgizilmeıdi. Al zańda harassment uǵymy atymen joq. Jalpy zorlyq-zombylyqtyń qaı túrin bolsyn, harassmentti de qatań qarap, zań jobasyna birqatar ózgertý men tolyqtyrý engizý qajettiligi týyndap otyr», - deıdi ol.
Ábden keshe ǵana mektep bitirip, aýylynan shyǵyp kórmegen aqúrpek balapandaı jap-jas qyzdardy qorǵaýymyz kerek ekenin aıtty. Ol ataǵandaı, ıbaly, keıde tym uıalshaq, jasqanshaq qazaq qyzy óz basynan ótken osyndaı jaǵdaıdy aıta bermeıdi.
Depýtat mynadaı usynystar aıtty:
harassmentke qatysty anonımdi saýalnamany elimizdiń barlyq joǵary oqý oryndarynda táýelsiz túrde ótkizýdi;
profesorlyq-oqytýshylyq quram men barlyq stýdent qyzdarǵa harassmentke qatysty zańnamalyq-quqyqtyq túsindirme jumystaryn júrgizýdi;
barlyq joǵary oqý oryndarynyń Jarǵysyna harassment týraly naqty erejeler engizýdi suraımyz!
Onyń málimetinshe, Bas prokýratýranyń derekteri boıynsha 2023 jyldyń 10 aıynda turmystyq zorlyq-zombylyqtan 85 áıel qaza tapqan.
Depýtat kelesi jyldy zorlyq-zombylyqqa qarsy kúres jyly dep jarıalaýdy usyndy.