Qaraǵandy ulttyq zertteý ýnıversıtetine prezıdent Qasym-Jomart Toqaevtyń 2025 jylǵy 12 tamyzdaǵy jarlyǵymen ulttyq mártebe berildi, dep habarlaıdy aqshamnews.kz Qaraǵandy oblysy ákimdiginiń baspasóz qyzmetine silteme jasap.
Osyǵan oraı oqý ornynda ótken kezdesýge ǵylym jáne joǵary bilim mınıstri Saıasat Nurbek, Qaraǵandy oblysynyń ákimi Ermaǵanbet Bólekpaev, Májilis depýtattary jáne profesorlyq-oqytýshylyq quram qatysty.
Jańa mártebe ýnıversıtetke akademıalyq jáne ǵylymı derbestikti keńeıtýge jol ashady. Ol jetekshi ǵalymdar men qarjy tartý múmkindigin arttyryp, halyqaralyq bilim keńistigindegi ornyn nyǵaıtady.
«Ýnıversıtettiń ulttyq mártebege ıe bolýy – tarıhı qadam. Bul mártebe oqý ornyna ıkemdilik pen akademıalyq erkindik beredi. Endi ýnıversıtet óz bilim berý baǵdarlamalaryn ázirlep, úzdik oqytýshylardy tarta alady, jańa zerthanalar ashyp, ónerkásiptik kásiporyndarmen birlesken jobalardy iske qosýǵa múmkindik alady. Munyń barlyǵy talantty jastardy tartýǵa yqpal etpek. Ulttyq mártebe – árdaıym qosymsha artyqshylyq», – dedi Saıasat Nurbek.
Mınıstr sondaı-aq memleket basshysynyń tapsyrmasymen Qaraǵandyda Ulybrıtanıanyń álemdik úzdik 200 ýnıversıtetiniń qataryna kiretin Ekseter ýnıversıtetiniń fılıalyn ashý máselesi qaralyp jatqanyn habarlady. Bul – ken isi mektebi saqtalǵan jalǵyz sheteldik oqý orny, sondyqtan ındýstrıaǵa baǵyttalǵan óńir úshin asa ózekti.
Óńir basshysy Ermaǵanbet Bólekpaev ýnıversıtet ujymyn quttyqtap, bul mártebeniń kópjyldyq eńbektiń, sapaly bilim berýdiń jáne ǵylymı áleýettiń nátıjesi ekenin atap ótti.
«Búginde memleket basshysynyń tapsyrmasymen óńirlerde ǵylym men bilimdi damytý basty basymdyqtardyń biri bolyp otyr. Qaraǵandy ýnıversıtetiniń jetistikteriniń joǵary baǵalanýy – sonyń aıqyn dáleli. Biz oqý ornymen birlese jumys isteýge daıynbyz. Munda jasalyp jatqan ǵylymı izdenisterdiń barlyǵy óńir úshin mańyzdy. Biz ýnıversıtetti áriptes qana emes, Qaraǵandy oblysyn damytýdaǵy jáne turǵyndardyń ómir sapasyn arttyrýdaǵy senimdi seriktesimiz dep bilemiz. Qaraǵandyny ǵylym men bilimniń ortalyǵyna aınaldyrý – ortaq maqsatymyz», – dedi óńir ákimi.
Ulttyq mártebeniń ýnıversıtettiń alǵashqy rektory, akademık Evneı Bóketovtyń 100 jyldyq mereıtoıymen tuspa-tus kelýi de erekshe mánge ıe.
«Osy ýnıversıtettiń túlegi ári Májilis depýtaty, oblystyń týmasy retinde bul jańalyqqa shyn júrekten qýanyshtymyn. Bul – profesorlyq-oqytýshylyq quramnyń qajyrly eńbeginiń jemisi. Ýnıversıtetti taǵy da shyn júrekten quttyqtaımyn», – dedi Májilis depýtaty Asqat Aımaǵambetov.
Kezdesý barysynda qatysýshylar uly ǵalym eskertkishine gúl shoqtaryn qoıdy.
Qazir oqý ornynda 14 myńnan astam stýdent, magıstrant jáne doktorant bilim alýda.
12 fakúltette 200-ge jýyq bilim berý baǵdarlamasy júzege asyrylyp keledi. Bóketov ýnıversıteti búginde elimizdegi jetekshi kópsalaly joǵary oqý oryndarynyń qatarynan laıyqty oryn alǵan.