13 qyrkúıek kúni Qaraǵandyda esirtki taralýyna qarsy kúres pen salaýatty ómir saltyn nasıhattaýǵa arnalǵan aýqymdy aksıa ótti, dep habarlaıdy aqshamnews.kz Qaraǵandy oblysy PD baspasóz qyzmetine silteme jasap.
İs-sharaǵa 1000-nan astam adam qatysty. Olardyń qatarynda Qaraǵandy qalasy polısıa basqarmasynyń qyzmetkerleri, B.Beısenov atyndaǵy Qaraǵandy Akademıasynyń kýrsanttary, Jastar resýrstyq ortalyǵynyń eriktileri, qoǵamdyq kómekshiler, tórt JOO (QarMÝ, QEÝ, QarMTÝ, QMÝ) stýdentteri jáne basqa oqý oryndarynyń ókilderi boldy. Qatysýshylar esirtki zattarynyń jarnamasy bar zańsyz graffıtıdi óshirý jáne esirtkige qarsy jadynamalar men býkletter taratý úshin birikti.
Aksıa barysynda qatysýshylar toptarǵa bólinip, ár top ýchaskelik polısıa ınspektorlarynyń basshylyǵymen belgilengen sektorlarda jumys istedi. İs-sharanyń nátıjesinde qala aýmaǵyndaǵy 4200-den astam zańsyz jazýlar men sýretter óshirilip, 3000-nan astam jadynamalar men býkletter taratyldy.
Qaraǵandy oblysy polısıa departamenti bastyǵynyń orynbasary, polısıa polkovnıgi Ábil Ábildınniń aıtýynsha, jyl basynan beri polısıa qyzmetkerleri esirtki satqany úshin 71 qylmystyq is qozǵaǵan, onyń 40-y graffıtı arqyly jasalǵan jarnamaǵa qatysty. Sonymen qatar, esirtki zattaryn taratýmen aınalysqan 53 adam ustalǵan, olardyń ishinde eki júkti áıel, kóp balaly ana, tórt stýdent jáne segiz kámeletke tolmaǵan jasóspirim bolǵan.
Jyl basynan beri polısıa qyzmetkerleri 10 000-ǵa jýyq esirtki jarnamasy bar graffıtıdi óshirgen. Polkovnık Ábildın graffıtı arqyly esirtkini jarnamalaǵany úshin 3 jyldan 6 jylǵa deıin bas bostandyǵynan aıyrý jazasy qarastyrylǵanyn atap ótti.