Oqıǵa ornyna jedel tergeý toby jiberilip, habarlama rastaldy
Qaraǵandyda “Arlan” arnaıy maqsat qyzmetkerleri birge turatyn áıeli men 2 jasar qyzyn kepilde ustaǵan kúdiktini ustady, dep habarlaıdy Almaty-akshamy.kz.
26 sáýir kúni saǵat 12.00 shamasynda Qaraǵandy qalalyq polısıa basqarmasyna qarasty Temirjol polısıa bólimine qaladaǵy kóp qabatty úılerdiń birinde janjal bolyp jatqany týraly habarlama tústi. Oqıǵa ornyna jedel tergeý toby jiberilip, habarlama rastaldy.
"Belgili bolǵandaı, 24 jastaǵy azamat 21 jastaǵy birge turatyn jary men 2 jastaǵy qyzyn pyshaqpen qorqytyp, kúshtep ustaǵan. Alaıda ol eshqandaı shart qoımaǵan. Qaskóımen aradaǵy kelissóz úsh saǵattan astam ýaqyt júrgizildi. Azamat eshqandaı kelissózge kónbedi. Sondyqtan da kepildiktegi adamdardyń ómirine qaýip tóngendikten, polısıa qyzmetkerlerine shuǵyl sheshim qabyldaýǵa týra keldi", – dedi Qaraǵandy oblystyq polısıa departamenti bastyǵynyń orynbasary Ábil Ábildın.
Tótenshe jaǵdaılar departamentiniń qyzmetkerleri páterdiń esigin buzǵan bette, “Arlan” arnaıy maqsattyń qyzmetkerleri birden ishke kirip, kúdiktini qolǵa túsirdi. Aldyn ala boljam boıynsha azamat esirtkilik masań kúıinde boldy. Jábirlenýshi azamatsha men onyń qyzy eshqandaı jábir kórgen joq. Olar daǵdarys ortalyǵyna ornalastyrylyp, psıhologıalyq kómek kórsetilip jatyr.
Atalǵan derek boıynsha Qazaqstan Respýblıkasy QK-niń 126-baby 2-bóligi 3-pýnktine sáıkes qylmystyq is tirkeldi. Qazirgi ýaqytta tergeý áreketteri júrgizilip jatyr.