Elimizdiń ekologıasyn jaqsartý úshin ǵalymdar shybyn dernásilin paıdalanbaqshy
Otandyq ǵalymdar ekologıany jaqsartýda jáne topyraqtyń qunaryn arttyrýda shybyn dernásilin taptyrmas tyńaıtqysh dep taýyp otyr. Qazir olar osy salada tájirıbelik jumystaryn júrgizip jatyr, dep habarlaıdy Almaty-akshamy.kz
Bir kılogramm shybyn dernásilin ósirý úshin 10-15 kılogramm qorek kerek. Ońtústik Amerıka shybyndary qustyń sańǵyryǵyn da, tamaq qaldyqtaryn da, aǵash úgindisi, bıdaı kebegi – bári-bárin talǵamaı jeı beredi. Tek tabıǵı bolsa bolǵany. Ǵylymǵa shybyndardan buryn olardyń dernásilderi baǵaly.
Ol ónimniń quramynda 40 prosent proteın, 30 prosent belok, qalǵan prosenti eń qajetti amın qyshqyldary bolyp tabylady. Bir kılogramm aqýyz alý úshin shybyn dernásiline 400 gram júgeri ketse, sıyrǵa 45,3 kg júgeri kerek. 1 kılogramm aqýyz alý úshin dernásilge 5400 lıtr sý ketse, sıyrǵa 110 000 lıtr sý kerek. Olar az qorekten paıdaly kóp ónim óndiredi.
«Osy ónimdi tutynǵan qustar, balyqtar, birinshiden, aýyrmaıdy, ekinshiden, massasyn, etin kóbirek jınaıdy, úshinshiden, jumyrtqa salýy jıirek bolady. Iaǵnı kúnine bir jumyrtqa salatyn bolsa, bizdiń dernásilderdiń arqasynda kúnine eki jumyrtqaǵa deıin salatyn bolady», - deıdi bıotehnolog, PHD doktory Serikhan Aıdarhanuly
«Bir túp qıarǵa 200-300 gram qoldanady. Maldyń, taýyqtyń qıyn alatyn bolsaq, 2-3 kg salynady bir túpke», - deıdi bıotehnologıa magıstri Sabyr Temirbaev.
«Bul úrdis álemniń basqa elderinde de júzege asýda. Endi biz bul shybyndardy medısınada qoldanýdy qolǵa alyp jatyrmyz. Bolashaqta kosmetologıa salasynda da zertteý júrgizbekpiz», - deıdi ǵalymdar.
Bir qyzyǵy, ekologıaǵa da, qaltaǵa da paıdasy mol bul jobany úı jaǵdaıynda da jasaý ońaı eken.