Bul da alaıaqtyqtyń jańa túri.
Jelide taraǵan aqparatta turǵyn almatylyqtardy kóshede qara jáshik usynǵan qyzdardan saq bolýǵa shaqyrdy, dep habarlaıdy aqshamnews.kz
Onyń aıtýynsha oqıǵa “Arbat” jaqta qyzy men qurbysy qydyryp júrgen kezinde bolǵan.
“Sol jerde janymyzǵa bizge jasy 18-19 shamasynda qolynda qara jáshigi bar bir qyz keldi. Qandaı da bir eksperıment týraly aıtty. Eger biz oǵan 40 myń teńge tólesek, osy jáshiktiń bárin bizge beretinin aıtty. Ol jáshikte “Apple” kompanıasynyń ónimderi bar ekenin aıtty. Qulaqqap, saǵat, bolmasa planshettiń bolýy múmkin ekenin jetkizdi. Osylaısha bul 40 myń teńge túgeldeı aqtalatynyn alǵa tartty. Men bul kúmándi usynystan bas tarttym. Alaıda qurbym táýekel etkisi keletinin aıtty. Oǵan jáshik ishinde ne bar ekeni qyzyq boldy. Ol 40 myń teńgeni jańaǵy qyzǵa aýdaryp jiberdi”, – dedi turǵyn.
Osylaısha keıin jáshikti ashqanynda onyń ishinen AirPods qulaqqabynyń 3 býyny, Vunker oıyny, jalǵaýshy symdar men qytaılyq qýattaǵysh qurylǵy bolǵan.
“Men AirPods-ty saıt arqyly tekserý kerek ekenin aıttym. Qurbym syrtyndaǵy japsyrmasy arqyly qarap edi, saıt túpnusqa ekenin kórsetti. Keıin biz SÝM saýda ortalyǵyna bardyq. Onda biz qulaqqapty kórsetip, satsaq qansha turatynyn suradyq. Al olar bizge munyń jasandy qurylǵy ekenin 6-7 myń teńge turatynyn aıtty. Keıin qurbym OLX qoldanbasyna kirip baǵasyn kórgisi keldi. Onda mundaı jalǵan túpnusqalyq japsyrmalary bar jasandy qurylǵylar óte kóp eken. Jáne olardyń baǵasy 65-70 myń teńgeden tur. Satylymda turǵandardyń kodtarynyń bári birdeı , bárine bir jalǵan japsyrmany qoldanǵan”, – dep qosty ol.
Turǵyn almatylyqtardy saq bolýǵa shaqyrdy.
“Bálkim 95 paıyz adam bul aqparatty bilmeýi múmkin. Kóshedegi mundaı adamdarǵa senbeńizder! Munyń barlyǵy jalǵan, aldaý. Jap-jas, ádemi qyzdardyń osylaı adamdardy aldap júrgeni ókinishti. Ómirindegi alǵashqy qadamdaryn alaıaqtyqpen aınalysyp bastap otyr. 40 myń teńge árıne úlken somma emes. Biraq aldaý durys emes nárse”, – dep qorytty ol.