Qys yzǵary sezilse, kólik júrgizýshileriniń dońǵalaqtar alyp, qamdana bastaıtyn shaǵy keldi degen sóz. Aqshamnews.kz tilshisi qys túspeı turyp júrgizýshiler neni bilýi kerek degen suraqqa jaýap izdep, keńester usynady. Avtosarapshy Oleg Sheıkonyń aıtýynsha, qysqy dońǵalaqtardy aıyppul tólemes úshin ǵana emes, qaýipsizdigińiz úshin de erterek almastyrǵan abzal.
Dóńgelekterdi qashanǵa deıin aýystyrý kerek?
"Dońǵalaqtardy aýystyrý úshin qar jaýǵanyn, muz qatqanyn kútýdiń qajeti joq. Temperatýraǵa mán bergen jón. Eger táýliktik ortasha temperatýra nólden tómen túsip, 5–7 kún qatarynan saqtalsa, shınany aýystyratyn ýaqyt kelgenin túsine berińiz", - deıdi shınomontaj salasynda 30 jyldan asa jumys istep kele jatqan Sheıko.
Qysqy shına sýyqta jumsara túsip, odan ári maıysqaq bola túsip, jolda tejegishtigin jaqsartady. Al jazǵy shına, kerisinshe, qataıýdyń áserinen asfált boıymen týra "syrǵyp" ketedi. Sonyń saldarynan tejeý joly uzaryp, apatty jaǵdaılarǵa alyp kelýi múmkin.
Zań ne deıdi?
ÁQBtK-niń 590-baby, 5-bóligine sáıkes, Qazaqstanda 1 jeltoqsannan 1 naýryzǵa deıin kólikter qysqy shınalarmen jabdyqtalýǵa tıis. Maýsymǵa saı kelmeıtin shınalardy qoldanǵandarǵa 5 AEK mólsherinde aıyppul salynady. 2025 jyly aıyppul kólemi - 19 660 teńge. Bir jyl ishinde qaıtalap buzǵan jaǵdaıda soma tórt ese ósedi - 20 AEK, ıaǵnı 78 640 teńge.
Keıbir óńirlerde, mysaly Astanada jáne elimizdiń soltústiginde, polısıa júrgizýshilerge maýsymdyq daıyndyq týraly erte eskerte bastady.
"Sýyq aýa raıy kúntizbedegi qystan buryn keledi, sondyqtan 1 jeltoqsandy kútý qaýipti. Tómen temperatýrada jazǵy shına ilinisin joǵaltyp, kólikti basqarý qıyndaıdy, al JKO qaýpi artady", - dep atap ótti elorda polısıa departamenti.
Qandaı shına tańdaǵan durys?
- Qala úshin: frıksıalyq (ıaǵnı "jabysqaq") shınalar durys, qar men taıǵaqtarda syrǵyp ketý qaýpi az.
- Qala syrty/trassa úshin: shıptelgen shınalar - júrgende dybysy qattyraq shyqqanymen, muzda senimdi júresiz.
- Negizgi qaǵıda: qaýipsizdikten únemdemeńiz. Protektor (shınanyń jolmen janasatyn syrtqy qabaty - esk.) 50%-dan artyq tozsa, shınany aýystyrý kerek. Jumysqa qabiletti tereńdik - kemi 4–5 mm, áıtpese qysqy shınanyń paıdasy shamaly, deıdi Sheıko.
Taǵy bir mańyzdy keńes:
- Shınany aýystyrǵannan keıin mindetti túrde balansırovka (dóńgelektiń (dısk + shına) massasyn teńgerý prosesi - esk.) jáne "dóńgelek geometrıasy" tekserisin jasańyz. Olaı bolmaǵan jaǵdaıda kólik bir jaqqa tartyp, jańa shına birneshe aıda-aq tozyp ketýi múmkin.
- Teńgerý prosesin ár 5–10 myń shaqyrym saıyn qaıtalap turǵan jón.