Ustalǵan azamat ony 4,5 myń dollarǵa satpaq bolǵan
Bishkek bazarynda qar barysynyń bas súıegi men terisin ustap júrgen qyrǵyzstandyq ustaldy, dep habarlaıdy Almaty-akshamy.kz BAQ.KZ-ke silteme jasap.
Bishkek polısıasy «Qudaıbergen» bazarynyń mańynda barystyń bas súıegi men terisi bar qyrǵyzstandyqty qolǵa túsirdi.
Tártip saqshylarynyń aıtýynsha, jergilikti turǵyn Talas oblysynyń bıik taýly aımaǵynda qar barysyn atyp alǵan. Onyń ústinen janýarlar men ósimdikterdi joıý baby boıynsha qylmystyq is qozǵaldy. İs materıaldary Talas oblystyq ishki ister departamentine tapsyryldy.
Belgili bolǵandaı, Qyzyl kitapqa engen barysty óltirgen 48 jastaǵy kúdikti janýardy qoılaryna shabýyl jasaý kezinde atyp alǵanyn aıtqan. Osydan keıin ol janýardyń etin soıyp, terisi men bas súıegin úıine alyp kelgen.
Byltyr Oshta Ulttyq qaýipsizdik komıtetiniń qyzmetkerleri úsh barystyń terisin satpaq bolǵan qyrǵyz azamatyn ustaǵan bolatyn. Qaýipsizdik qyzmeti ustalǵan azamat ony 4,5 myń dollarǵa satpaq bolǵanyn málimdedi.
Qar barysy Ortalyq Azıa taýlarynda mekendeıdi.
Dúnıejúzilik jabaıy tabıǵat qorynyń málimeti boıynsha, planetada tórt myńǵa jýyq qar barysy qalǵan. Janýar mekendeıtin 12 eldiń Qyzyl kitabyna engizilgen. 2017 jyly Qyrǵyzstanda barysty atyp, aýlaǵany úshin salynatyn aıyppul 500 myń somnan 1,5 mıllıon somǵa deıin kóterildi.