Balyq aýlamaq bolǵan balyqshy muzǵa shyqqan.
2024 jylǵy 19 aqpanda saǵat 12:12-de Almaty oblysy TJD kezekshi bólimine Qonaev qalasy Qapshaǵaı sý qoımasynda muz jarylyp, muz ústinde adam qalyp qoıǵany týraly habarlama kelip tústi.
Oqıǵa ornyna Almaty oblysy TJD qyzmetkerleri dereý bardy.
Qutqarýshylar oqıǵa ornyna kelgennen keıin bul azamattyń balyq aýlaý úshin muzǵa shyqqany anyqtaldy. Alaıda, muz jaǵadan bólinip, balyqshy ózdiginen jaǵaǵa orala almaǵan. Qutqarýshylar avarıalyq-qutqarý jumystaryn júrgizip, azamat evakýasıalandy.
Bul azamat QR ÁQBtK-niń 412-babyna sáıkes sý aıdyndarynda (muzda) qaýipsizdik erejelerin saqtamaǵany úshin ákimshilik jaýapkershilikke tartyldy.
Qalyptasqan turaqsyz aýa-raıyna baılanysty jáne jazataıym oqıǵalardyń aldyn alý, juqa muzda jaraqat alý men adam óliminiń aldyn alý maqsatynda Almaty oblysynyń TJD sý aıdyndarynda qaýipsizdik erejelerin saqtaýǵa jáne juqa muzǵa shyǵýdan bas tartýǵa shaqyrady.
Esterińizge sala keteıik, osyǵan uqsas jaǵdaı osydan eki kún buryn da bolǵan edi. Bul týraly birer kún buryn saıtymyzda habarlaǵan bolatynbyz.