Almatynyń Samǵaý yqshamaýdanynda turǵyndardy alańdatqan oqıǵa tirkeldi, - dep habarlaıdy Aqshamnews.kz.
Qurbylarymen serýendep júrgen jas qyzdar átkenshektiń astynda jatqan úlken qapty baıqap, bastapqyda ony qoqys dep oılaǵan. Olar qaptyń ústine otyryp, aıaqtarymen tepkilegenimen, eshqandaı qozǵalys baıqalmaǵan. Túngi ýaqytta balalar alańynyń janynda qaptyń ishinde jatqan er adamnyń vıdeosy áleýmettik jelide tarap júr.
Birneshe mınýttan keıin qasynan ótip bara jatqan basqa qyzdar: «Qarańdarshy, ishinde adam jatyr ǵoı» dep eskertkende ǵana jasóspirimder shoshyp qalǵan. Olar biraz ýaqyt osy mańda otyrǵannan keıin joldan ótken jigitten qapty ashýdy suraıdy. Sol sátte qaptyń ishinen kenetten adamnyń daýysy shyǵady.
«Men senderge kedergi jasap turmyn ba?» – degen er adamǵa qyzdar «ıá» dep jaýap bergende, ol: «Onda ári qaraı teýip otyra berińder» dep jaýap qatqan. Qoryqqan qyzdar qasha jónelgen.
Jasóspirimderdiń biri polısıaǵa qońyraý shalyp, tártip saqshylary 15 mınýt ishinde oqıǵa ornyna jetken. Dál osy kezde qaptaǵy er adam syrtqa shyǵyp, qashpaq bolǵanymen, polısıa qyzmetkerleri ony qýyp júrip ustaǵan.
Oqıǵaǵa baılanysty Aqshamnews.kz Almaty qalalyq Polısıa departamentiniń Baspasóz qyzmetinen túsinikteme aldy.
«7 qyrkúıek kúni er adam polısıa qyzmetkerlerimen Alataý aýdandyq polısıa basqarmasyna jetkizildi. Onyń aıtýynsha, qatty sharshaǵandyqtan uıyqtap qalǵan. Qoǵamdyq tártipti buzǵany úshin ol ákimshilik jaýapkershilikke tartyldy», – delingen Polısıa departamentiniń habarlamasynda.
Qalalyq polısıa departamenti turǵyndardy qyraǵy bolýǵa shaqyryp, kúmándi jaǵdaılar týyndaǵan kezde dereý 102 nómirine habarlasýdy eskertti.