İri bıznes qant tapshylyǵyna shydasa da, kofehana men kondıterlik dúken sıaqty shaǵyn kásipkerler qatty qınalyp jatyr.
Resmı málimetke sáıkes, 60 myń qoǵamdyq tamaqtaný oryndary qıyn jaǵdaıǵa tap boldy, dep habarlaıdy Almaty-akshamy.kz «Habar 24» arnasyna silteme jasap.
Qazaqstanda qanttyń baǵasy sharyqtap ketti. Sonyń saldarynan myńdaǵan kásipker bankrot bolýy múmkin.
Dámhana men meıramhanalar pandemıa kezinde biraz klıentten aıyrylyp qaldy. Al qant qymbatshylyǵy jyǵylǵan ústine judyryq boldy. Keıbir aımaqtarda qant múldem joq, ıa bolmasa, baǵasy ýdaı.
Bıznesmenderge tamaq aqysyn kóterýge bolatyn edi. Biraq olaı istesek, klıentterden birjola aıyrylamyz deıdi.
«Búginde as mázirindegi taǵamdardyń 90 prosentinde qant qoldanylady. Nannan bastap et jáne taǵysyn taǵy. Marınad bar, san alýan soýstarǵa da qosady. Qazir qanttyń baǵasy kosmos bolyp ketti ǵoı. Kelisine 800-900 teńge suraıdy. Al bizge baǵany kótergen tıimsiz. Sebebi pandemıa kezinde onsyz da klıentterdiń 30 prosenti ketip qaldy», - deıdi qoǵamdyq tamaqtaný qaýymdastyǵy tóraǵasynyń keńesshisi Veronıka Nurpeıisova.
İri bıznes qant tapshylyǵyna shydasa, kofehana men kondıterlik dúken sıaqty shaǵyn kásipkerler qatty qınalyp jatyr. Olarǵa kún saıyn shamamen 100 keli qant kerek. Sol sıaqty naýbaıhanalarǵa da aıyna kem degende 500 keli qant qajet. Al onyń baǵasy kúrt kóterilgennen keıin mıllıondap aqsha shyǵarýǵa týra kelip otyr.
«Biz bankrottyq jaǵdaıǵa tap boldyq. Shıkizat joq, jumys joq. Endi ne isteımiz? Búgin be, erteń be, jabylýymyz múmkin. Ónim jasaıtyn shıkizat joq. Iá, baǵany kóterip, sonyń esebinen qant alsaq ta bolatyn edi. Alaıda ondaı jaǵdaıda jaı nannyń ózi 500 teńge bolady, al qarabıdaı nany 1000 teńge bolyp ketedi», - deıdi kásipker Ekaterına Vasıleva.
Aýyl sharýashylyǵy mınıstri Erbol Qarashókeev kúzge qaraı jaǵdaı túzeledi dep otyr. Biraq qazirdiń ózinde qanttyń eń tómen baǵasy shamamen bir kelisi 595-600 teńge bolýy qajet eken.
Al Saýda jáne ıntegrasıa mınıstri Baqyt Sultanov eki apta buryn eki saýda jelisinen bir keli qantty 470 teńgege satyp alǵan.
«Qazir ol jelide 480-nen satyp jatyr», - deıdi Sultanov.