Qańtar aıyndaǵy UBT-nyń birinshi aptasynda 31 myńǵa jýyq adam test tapsyrdy.
Shekti baldy 60%-ǵa jýyq talapker jınady. Testileý nátıjesi boıynsha ortasha bal 58 baldy qurady. Eń joǵary bal – 136, ony Túrkistan oblysynyń oqýshysy jınady, dep habarlaıdy aqshamnews.kz.
Testke qatysýshylardyń 69,3%-y qazaq tilinde, 30,6%-y orys tilinde, 27 adam aǵylshyn tilinde testileýden ótti.
Talapkerlerdiń basym bóligi, atap aıtqanda, 18,2%-y «Matematıka-Fızıka» pánder kombınasıasyn tapsyrdy. 13,5%-y «Bıologıa-Hımıa», 13,3% «Shyǵarmashylyq emtıhan» kombınasıasyn tańdaǵan. Eń az tańdalǵan kombınasıa – «Hımıa-Fızıka», ony 55 adam tapsyrǵan.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda qańtar UBT-syna 101 talapker qatysty.
Talapkerler testileý aıaqtalǵannan keıin 30 mınýt ishinde apelásıaǵa bere alady, bul jaǵdaıda sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Qazirgi tańda 71 adamnyń nátıjesi joıyldy. Onyń ishinde 37 talapker smartfon jáne shpargalka sıaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorıadan 34 adam shyǵaryldy. Ózge tulǵalar anyqtalǵan joq.
Aıta ketsek, 2025 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
Esterińizge sala ketsek, qańtar UBT-sy 13 qańtar men 10 aqpan aralyǵynda ótedi. Testileýge qatysýǵa 167 myńǵa jýyq talapker nıet bildirgen.