Bostandyq aýdanynyń №2 sotynda jappaı tártipsizdikke qatysyp, shabýyl jasaý faktisi boıynsha bes adamǵa qatysty qylmystyq is qaraldy.
Sot K, A, K, V jáne T esimdi azamattardyń 2022 jyly 4-5 qańtar aralyǵynda jappaı tártipsizdikke qatysyp, ǵımarattar men qurylystarǵa shabýyl jasaǵanyn anyqtady, dep habarlaıdy Almaty-akshamy.kz QazAqparatqa silteme jasap.
Sondaı-aq bes sottalýshy da tártipsizdikke qatysý kezinde qaza tapqan.
Qazaqstan Respýblıkasy Qylmystyq kodeksiniń 272-babynyń 2-bóligi boıynsha 3 jyldan 8 jylǵa deıingi merzimge bas bostandyǵynan aıyrý túrindegi jaza qarastyrylǵan, 269-baptyń 2-bóligi boıynsha 7 jyldan 12 jylǵa deıin sottap, múlkin tárkileý jazasy kózdelgen.
«Sottalýshylardyń kinási alynǵan beınejazbalarmen, kýágerler men týystarynyń taný týraly hattamasymen, júrgizilgen sot-medısınalyq saraptama jáne uıaly telefondardyń ornalasqan jeri týraly málimetter arqyly dáleldendi. Olar Almaty qalasy ákimdigine jáne Prezıdent rezıdensıasyna shabýyl jasaǵan kezde kúzet qyzmeti atys qarýyn qoldanǵany rastaldy. Beseýi de sol atys kezinde qaza tapty»,- dep habarlady qalalyq sottan.
Vedomstvo málimetinshe, atalǵan qylmystyq istiń qarastyrylýynyń sebebi - sottalýshylardyń zańdy ókilderi qylmystyq isti QR QPK 35-baby 1-bóligi 11-tarmaǵy boıynsha qysqartýǵa qarsy bolǵan.
«Sottalýshylar kináli dep tanylyp, Qylmystyq-prosestik kodekstiń 35-baby 1-bóligi 11-tarmaǵy negizinde qylmystyq jaýapkershilikten bosatyldy»,- dep atap ótti sot ókilderi.
Sot úkimi zańdy kúshine engen joq.