Terorızm aktisi men jappaı tártipsizdikterdi tergeý jalǵasýda.
Elimizdegi jappaı tártipsizdikterdi uıymdastyrý kúdigimen 467 adam qamaýǵa alyndy. Bul týraly QR Bas prokýratýrasy Arnaıy prokýrorlar qyzmetiniń bastyǵy Rızabek Ojarov aıtty, dep habarlaıdy Almaty-akshamy.kz QazAqparatqa silteme jasap.
«Vedomstvoaralyq jedel tergeý toby terorızm aktisi men jappaı tártipsizdikterdi tergeýdi jalǵastyrýda. Jumystar 8 óńir boıynsha, Almaty, Shymkent qalalarynda jáne Almaty, Jambyl, Qyzylorda, Shyǵys Qazaqstan, Aqtóbe jáne Atyraý oblystarynda júrgizilýde. Sebebi dál osy aımaqtarda kóptegen adam ólimi oryn aldy. Memlekettik jáne jeke nysandar qıratylyp, órteldi», - dedi Rızabek Ojarov Ortalyq komýnıkasıalar qyzmetindegi brıfıń barysynda.
Onyń atap ótýinshe, bir aıdyń ishinde vedomstvoaralyq top aýqymdy kólemde tergeý jumystaryn atqardy.
«Jaýaptar alynýda, beınematerıaldar zerdelenýde. Saraptamalar taǵaıyndalýda, eksgýmasıalar, máıitterdi ıdentıfıkasıalaý júrgizilýde jáne olardyń qaıtys bolý sebepteri anyqtalýda. Osy rette azamattardyń dáleldemeler jınaýdaǵy belsendi kómegin atap ótkim keledi. Bizdiń «Stopterrorızm» saıtyna 1672 faıl júktelgen», - dedi ol.
Bas prokýratýra ókiliniń dereginshe, olar qańtar oqıǵasyna qatysty vıdeo jáne fotosýretterdi quraıdy.
«Bıznes ókilderi de kómektesýde. Olar beınebaqylaý kameralary men jazylǵan aqparattardy jiberýde. IT-tehnologıalardy paıdalana otyryp, oqıǵalarǵa qatysy bar barlyq adamdardy anyqtaýdy jalǵastyryp jatyrmyz. Jappaı tártipsizdikterdi uıymdastyrý men oǵan qatysý jáne terorızm aktisin jasaýǵa qatysty 467 adam qamaýǵa alyndy. Biz olardyń jeke basyn, otbasylyq jaǵdaıyn, jasyn, densaýlyq jaǵdaıyn, qatysý dárejesin, óz isterine degen kózqarasyn jáne basqa da sıpattaıtyn derekterdi muqıat zertteımiz», - dep atap ótti qadaǵalaýshy organ ókili.