Jalpy, 5 300 qylmystyq is qozǵalǵan.
Bas prokýror Berik Asylov qańtardaǵy tártipsizdikten keıin qansha adam sottalǵanyn aıtty, dep habarlaıdy Almaty-akshamy.kz
Asylov qańtarda jasalǵan qylmystar boıynsha jalpy 5 300 qylmystyq is qozǵalǵanyn atap ótti. Basym bóligin İshki ister mınıstrligi tergegen (4 623) adam óltirý, urlyq, qaraqshylyq, qarý-jaraq urlaý sıaqty qylmystar.
«Ulttyq qaýipsizdik komıteti memleketke opasyzdyq jasaý, bılikti basyp alý, asa iri kólemde para alý faktilerin tergedi. Arnaıy prokýrorlar 720 qylmystyq isti tergedi. Bul ister boıynsha tyıym salynǵan ekstremıstik toptardyń 25 múshesi ustaldy. Uıymdasqan qylmystyq toptardyń 42 múshesi qamaýǵa alyndy. Odan bólek, kúdiktilerdiń arasynda destrýktıvti dinı aǵymdardyń 8 jaqtaýshysy bar. 126 adam kisi óltirý, urlyq, tonaý jáne qaraqshylyq jasaǵandary úshin buryn sottalǵan», dedi Berik Asylov.
Onyń aıtýynsha, jappaı tártipsizdikke qatysýshylardyń kóbi – 35 -ke deıingi jastar.
«Budan bólek, sheteldik azamattar jappaı tártipsizdikke qatysýǵa jáne basqa qylmystar boıynsha kúdikti bolyp tanyldy. Onyń ishinde Ózbekstan, Reseı, Qyrǵyzstan jáne Tájikstan azamattary bar. Búginde bizdiń ister boıynsha 573 adam sottaldy. Onyń ishinde eki is – terakt jasaý faktisi boıynsha. Qazirgi tańda jappaı tártipsizdikti uıymdastyrýshylar retinde 18 adam anyqtaldy. Olardyń 13-ine qatysty is sotta qaralyp jatyr», dedi Bas prokýror.
Sondaı aq sol kezde kúshtik organdardyń birqatar qyzmetkeri ustalǵandarǵa qatygezdik tanytqanyn aıtty.
«Bul jaǵdaıdy esh nársemen aqtaýǵa bolmaıdy. Prezıdent tapsyrǵandaı, azaptaý qoldanǵan qyzmetkerler shenine qaramastan tıisti jazasyn alady jáne alyp ta jatyr. Azaptaýlar týraly shaǵymdar boıynsha barlyǵy 329 qylmystyq is qozǵaldy. Olardyń basym bóligi Sybaılas jemqorlyqqa qarsy is-qımyl qyzmetinde boldy. Arnaıy prokýrorlar polısıa men Ulttyq qaýipsizdik komıtetiniń 34 qyzmetkerine qatysty isti tergedi. Almaty oblysynyń polısıa ǵımaratynda 24 adamdy azaptaý faktileri týraly ister sotqa joldandy», - dedi ol.
Berik Asylov keltirgen málimetke súıensek, qańtar oqıǵasy boıynsha sottar 1 221 adamnyń ústinen qozǵalǵan isterdi qarady, olardyń ishinde 1 205 adam sottaldy. Qazir 315 adamǵa qatysty 127 qylmystyq is tergelip jatyr. Olar boıynsha jedel tergeý is-sharalary júrip jatyr.
«Memleket basshysy Joldaýynda raqymshylyq jasaý qajet ekenin atap ótti. Sondyqtan «Raqymshylyq jasaý týraly» zań qabyldandy. Zań aıasynda arandatýshylardyń aıtqanyna kónip, jappaı tártipsizdik kezinde qylmys jasaǵandar jazadan bosatyldy. Raqymshylyq 1 095 adamǵa qoldanyldy. Atap aıtqanda, sot aýyr qylmystar úshin sottalǵan 1 001 adamnyń jaza merzimin qysqartty», - dedi Berik Asylov.
Buǵan qosa Bas prokýror joǵarǵy basshylyǵyn aýystyrýǵa baǵyttalǵan operasıanyń tyńǵylyqty josparlanǵanǵanyn málimdedi.