Ulttyq statısıka búrosynyń málimetinshe, byltyr munaı men kondensat óndirý kólemi 87,6 mln tonnany qurady.
Shıki munaı óndirýde ónerkásiptik óndiristiń ındeksi 97,5%-dy, al tabıǵı gaz óndirisinde 99,4% bolǵan, dep habarlaıdy aqshamnews.kz.
Jalpy, elimizdiń 2024 jylǵy qańtar-jeltoqsan aralyǵyndaǵy ónerkásiptik óndiris ındeksi 102,8%-ǵa jetken. Osy derekterge qarap otyryp, bizde munaı qory qansha degen suraq sap ete qalady. 1990 jyldan beri elimizde 1,94 mlrd tonna munaı óndirilgen. Qazir jer qoınaýynda shamamen 4 mlrd tonna munaı qory bar kórinedi.
Munaı óndirisi men onyń álemdik naryqtaǵy orny týraly boljamdar keler eki jylda aıtarlyqtaı ózgermek. AQSH-tyń Energetıkalyq aqparat basqarmasy (EIA) keltirgen málimetke sáıkes, 2025 jyly elimizde táýligine 1,89 mln barel munaı óndiriledi. 2026 jyly munaı óndirisi birtindep artyp, jyl sońyna qaraı táýligine 2 mln barrelden asýy múmkin.
Munaı baǵasyna qatysty da mańyzdy boljamdar jasaldy. 2025 jyly Brent markaly munaı baǵasy barreline 74 dollarǵa deıin tómendeýi múmkin bolsa, 2026 jyly bul baǵa 66 dollarǵa deıin túsýge tıis. Munyń sebebi – álemdik naryqtaǵy munaı usynysynyń artýy. 2025 jyly munaıǵa degen álemdik suranys táýligine 104,1 mln barelge jetedi degenmen, naryqtaǵy usynys odan asyp, 104,4 mln barelge jaqyndamaq. Osylaısha, usynystyń suranystan joǵary bolýy baǵanyń tómendeýine ákeledi.