Jyl basynan beri Qazaqstanǵa 13569 qandas kelgen.
Bul týraly Úkimet otyrysynda Kóshi-qon saıasaty tujyrymdasyn iske asyrý barysyn talqylaý kezinde Premer-Mınıstrdiń orynbasary–Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy Almaty-akshamy.kz QazAqparatqa silteme jasap.
«1 shildeden bastap Qazaqstannyń konsýldyqtary sheteldegi qandastarymyzdyń ótinishterin «bir tereze» qaǵıdaty boıynsha qaraı bastady. Qandastardy elge qonystandyrýdyń jańa algorıtmi jasalyp, ol 4 sanat boıynsha júrgizile bastady. Birinshiden, jumys berýshilerdiń suranysy boıynsha qajet kásip ıelerin tartý. Mundaı suranys jumys kúshi jetpeı jatqan barsha óńirlerdiń jumys berýshilerinen túsýi múmkin, bul rette qandastarymyz sol jumys berýshiniń lokasıasyndaǵy óńirge jiberiletin bolady», - dedi T. Dúısenova.
Ekinshiden, qandastarymyzdyń ata-anasy nemese balalary erterek kelip, azamattyq alyp, belgili bir kásippen aınalysyp júrgen bolsa, onda shet eldik qandastarymyz olar turyp jatqan jerge otbasymen, týystarymen qaýyshý maqsatynda kóship kelýi múmkin. Úshinshiden, óńirler óz terıtorıasynda damý áleýeti bar eldi mekenderdi anyqtap, sol jerlerge demografıalyq úderisti kúsheıtý maqsatynda qandastarymyzdy shaqyrý múmkin.
«Tórtinshiden,Úkimet aıqyndaǵan óńirlerge joldama berý tártibi bar. Aıta ketetin jáıt, áleýmettik paket tek tórtinshi, ıaǵnı Úkimet aıqyndaǵan óńirlerge joldama alǵan qandastarymyzǵa ǵana beriledi. Jyl basynan beri Qazaqstanǵa 13569 qandas baýyrymyz keldi, onyń 8547-si eńbekke qabiletti. Olar áleýmettik qoldaý jáne beıimdeý, jumysqa ornalastyrý sharalarymen qamtylǵan», - dedi mınıstr.