QR Eńbek jáne halyqty áleýmettik qorǵaý mınıstriniń buıryǵymen qandastar men qonys aýdarýshylardy qabyldaýdyń 2024 jylǵa arnalǵan óńirlik kvotasy 9 483 adam dep belgilendi, bul 2023 jylmen salystyrǵanda 554 adamǵa artyq, dep habarlaıdy Almaty-akshamy.kz
Buıryqtyń maqsaty Qazaqstan Respýblıkasy Úkimeti aıqyndaıtyn óńirlerde qandastar men qonys aýdarýshylardy ońtaıly qonystandyrý. 2024 jyly óńirlik kvota oblystar boıynsha tómendegideı bólindi:
- qandastar úshin: Pavlodar oblysy – 902, Qostanaı oblysy – 550, Aqmola oblysy – 285, Shyǵys Qazaqstan oblysy – 269, Soltústik Qazaqstan oblysy – 207 adam, Abaı oblysy – 220 adam;
- qonys aýdarýshylar úshin: Soltústik Qazaqstan oblysy – 2 702, Pavlodar oblysy – 2 603, Qostanaı oblysy – 950, Shyǵys Qazaqstan oblysy – 372, Abaı oblysy – 255, Ulytaý oblysy – 132, Qaraǵandy oblysy – 36 adam.
Qandastar men qonys aýdarýshylardy qabyldaýdyń óńirlik kvotasyna engizilgen adamdarǵa memlekettik qoldaý sharasy kórsetiletin bolady, atap aıtqanda:
- kóshýge sýbsıdıalar – otbasynyń árbir múshesine 70 AEK boıynsha birjolǵy tólem;
- 12 aı ishinde bir otbasyna 15-ten 30 AEK-ke deıin tólenetin turǵyn úıdi jaldaý (jalǵa alý) jáne komýnaldyq qyzmetterge aqy tóleý boıynsha shyǵystardy jabý úshin sýbsıdıalar;
- 400 AEK mólsherinde qonys aýdarýǵa járdem kórsetetin jumys berýshiler úshin sýbsıdıalar;
- qysqa merzimdi kásiptik oqytýǵa joldama;
- jumysqa ornalasýǵa nemese kásipkerlik bastamany damytýǵa járdemdesý;
- turǵyn úı satyp alýǵa ekonomıkalyq mobıldilik sertıfıkattaryn berý.
Esterińizge sala keteıik, 1991 jyldan bastap 2024 jylǵy 1 qańtar aralyǵynda 1 mln 128,37 myń etnıkalyq qazaq tarıhı otanyna oraldy.
2023 jyly 21,3 myń etnıkalyq qazaq tarıhı otanymen tabysyp, qandas mártebesin aldy.