Búlik kezinde 114 adam zardap shekken
Búgin Almaty oblysynyń ákimi Qanat Bozymbaev Taldyqorǵan qalalyq kóp salaly aýrýhanaǵa baryp, búlik kezinde zardap shekken azamattardyń densaýlyq jaǵdaıyn bildi, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Qanat Bozymbaev jaralanǵan qarapaıym azamattarmen jáne kúshtik qurylymdar ókilderimen tildesti. Qyzmettik mindetterin adal oryndap, qaısarlyq pen batyrlyqtyń úlgisin kórsetkenderi úshin áskerı mamandarǵa alǵys bildirdi. Olardyń otbasylaryna barlyq qajetti kómek kórsetiletinin aıtty.
«Eń bastysy - densaýlyq. Sizderdiń aıaqtan turyp ketýlerińizge barlyq jaǵdaıdy jasaýdamyz. Qajet bolsa basqa qalalardan tıisti mamandardy shaqyrtamyz. Tıisti em sharalaryn tolyq qabyldap, tezirek saýyǵyp shyǵýlaryńyzǵa tilektespin», - dedi Qanat Bozymbaev.
Taldyqorǵan qalalyq kóp salaly aýrýhananyń dırektory Jumahan Moldaǵulovtyń aıtýynsha, bul mekemege zardap shekken 114 adam júginip, onyń 25-i aýrýhanaǵa jatqyzylǵan. Qalǵandaryna tıisti ambýlatorıalyq em jasalǵan. Kúrdeli kezeńde aýrýhanada dárigerlerdiń kúsheıtilgen brıgadasy jumys istep, zardap shekkenderge joǵary deńgeıde medısınalyq kómek kórsetildi.
«Búgingi kúni aýrýhanaǵa túsken 25 adamnyń 15-i jazylyp shyqty. Operasıa jasalǵan 10 adam ońaltý em sharalaryn qabyldaýda. Olardyń densaýlyǵy birte-birte túzelip keledi», - dedi J.Moldaǵulov.